Ситекри пилорама тулли хăватпа ĕçлет

"Урожай" ОООра бруссемпе хӑмасем кăлараҫҫӗ.

Хӗллехи кунсенче ялхуҫалӑх предприятийӗн хуҫалӑх картишӗнче ӗҫ вӗресе тӑрать. Ӑшӑтакан пӳлӗмре механизаторсем сӳресемпе тракторсем юсаҫҫӗ, арманта фураж тырри авӑртаççĕ, стройматериалсем кăларса пилорама шавлать.

— Уй-хир ĕçĕсене вĕçленӗ хыҫҫӑнах эпир пилорамӑра ӗҫлеме пуçларăмăр, — тет хуҫалӑх ертӳҫи Юрий Иванович Иванов. — Делянка ҫырса илтĕмĕр. Вӑрман хатӗрлеме пуҫларӗҫ. Андрей Григорьев, Олег Саватнеев тата Геннадий Андреев йывăç каснă çĕрте хастар ӗҫлерĕç. Вӑрман турттарнă çĕрте Владимир Сурков водитель тăрăшрĕ, вăл пилорама патне пĕренесем турттарчĕ. Хальхи вӑхӑтра ҫӗнӗ склад тума, сӗт ферминчи урайсене улӑштарма валли хурӑн хăма тата пăрăссем тӑватпӑр. Пилорамӑра Иван Пекин асли шутланать, унпа пӗрле Вадим Михлюков, Андрей Никитин, Дмитрий Михлюков тата Раяс Хайбрахманов ӗҫлеҫҫӗ. Хатӗрлесе хунӑ строительство материалӗ тӳрех ӗҫе каять.

Владимир СМОЛОВ.

Сăнÿкерчĕкĕ: Владимир СМОЛОВ.