«ÇĔНТЕРŸ КУНĔ» ЮРРА ПУÇЛАСА ЧĂВАШЛА ЮРЛАÇÇĔ

Атăлçи федераллĕ округра Раççей Федерацийĕн полномочлă представителĕн аппарачĕ пуçарнипе масштаблă акци иртет — «Пирĕн Çĕнтерÿ Кунĕ».

Проект йĕркипе Атăлçи федераллĕ округри 14 регионра пуринче те чапа тухнă Давид Тухмановпа Владимир Харитоновăн «Çĕнтерÿ кунĕ» юрра тăван чĕлхисемпе юрлаççĕ.

Акци тĕлне ятарласа юрра Чăваш Республикин культурин тава тивĕçлĕ ĕçченĕ, халăх поэчĕ Юрий Сементер чăваш чĕлхине куçарнă. Ролика «Çĕнтерÿ» асăну комплексĕнче, Çар мухтавĕн музейĕнче, «Трактор тăвакансен Культура çуртĕнче» ÿкернĕ.

Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев палăртса хăварнă: «Чăваш Республикишĕн акцие хутшăнасси пысăк чыс. Эпир Çĕнтерĕве туптанă пирĕн ентешсемпе мăнаçланатпăр. Çак проект пулăшнипе ветерансене хăюлăхшăн, Тăван çĕршыва юратнăшăн тав тумалли меллĕ самант». Вăрçă çулĕсенче Чăваш Енрен 208 пин ытла çын фронта кайнă, вĕсенчен çурри ытларахăшĕ пуçне хунă. Тылра юлнисем фронтшăн, çĕнтерÿшĕн пурне те тунă.

Ҫӗнтерÿ символӗ пулса тӑнӑ юрра ҫырнӑранпа кăçал 45 ҫул тулать, ăна Чăваш патшалăх филармонийĕн артисчĕ Юрий Катков, Чăваш патшалăх оперăпа балет солисчĕсем Маргарита Финогентовапа Иван Николаев, Алексей Московский тата Ольга Пеганова юрăçсем, «Шăпчăксем» хор, «Классика» юрă капелли, «Пурăн тата асра тыт» халăх ансамблĕ шӑрантарнӑ.

Ролика ÿкернĕ режиссер тата сценарист Александра Васильева юрă чăвашла питĕ килĕшÿллĕ янăранăшăн пурне те тав тунă. Чăваш Ен эстафетăна Киров облаçне парать.
Федерацин Атӑлҫи округӗнче пултарулӑх ушкӑнӗсем юрланисене 2020 ҫулхи февраль вӗҫӗнче — март пуҫламӑшӗнче самоизоляци йерки пуçланиччен ҫыртарса илнӗ.

Республикăсемпе облаçсенчи пултарулăх ушкăнӗсен юррисене вырӑнти телеканалсемпе радиостанцисенче апрелӗн 25-мӗшӗнчен пуҫласа майӑн 8-мӗшӗччен ҫавӑрттараҫҫӗ.

#песнипобедыПФО #нашденьпобеды акци патне кашни кун ҫӗнӗ регион хутшӑнать.