Владимир — ашшĕ-амашĕн тата шкул мăнаçлăхĕ

Володя Йăлпăлакри Дениспа Наталья Даниловсен çемйинче ÿсет. Каччă тимлĕ, ырă кăмăллă, ялан пулăшма хатĕр. Мĕн пĕчĕкрен спортпа туслă — çăмăл атлетикăпа, волейболпа, куреш кĕрешÿпе киленет, ытти спорт тесĕсенче хăйĕн вăйне тĕрĕслет.

Шкул чысне хÿтĕлесе çамрăк спортсмен тĕрлĕ ăмăртусенче малти вырăнсем йышăнать, çакна йышлă грамотăсемпе медальсем çирĕплетсе параççĕ. Нумай пулмасть Владимир Альшей районĕнче иртнĕ Пушкăртстан Республикин шкул ачисен XXII Спартакиадин зона ăмăртăвĕнче куреш кĕрешÿре хăйĕн виçе категоринче 1-мĕш вырăн йышăннă.

— Ывăл — пирĕн тĕрек тата пĕрремĕш пулăшакан. Килте пĕр ĕçрен те хăрамасть, ÿркенмест, хуçалăхра пурне те тума пĕлет, — каласа парать Володьăн амăшĕ Наталья Владимировна. — Нумай пулмасть çĕнĕ çурт хăпартса пурăнма кĕтĕмĕр, Володя стройкăра ашшĕн сылтăм алли пулчĕ. Аслашшĕ-кукашшĕпе асламăш-кукамăшне те пулăшма ĕлкĕрет вăл. Çулла ĕçлесе илнĕ укçине те пустуй тăкакламасть.

Пĕлтĕр Владимир спортри уйрăм çитĕнÿсемшĕн И.Р. Гимаев ячĕллĕ стипендие тивĕçнĕ. 2019 çул уншăн питĕ тулăх пулнă. Пĕлтĕртен Владимир Alfa Sport спорт мопечĕпе çÿреме пуçланă.

Малашне Володя Данилов МЧСра ĕçлеме тата çынсене пулăшма ĕмĕтленет, мĕншĕн тесен унăн лартнă тĕллевне çĕнсе илме çинетăруллăхĕ çителĕклĕ.

Айгуль ГАРЕЕВА.