Елена çĕнĕ тĕллевсем лартать

Хушăлкари Елена Петрова нимӗнле ӑнӑҫу та ҫук тесе шутлать, çинетăрулăх тата тӑрӑшулăх кӑна пур.

Кӑҫал Хушăлкари вӑтам шкулти тӑватӑ выпускник ылтӑн медальпе шкул пӗтерчӗ. Медалисткӑсенчен пӗри Елена Петрова.

Елена пысӑк ҫемьере ҫитӗннӗ. Ашшӗ хуралҫӑ пулса ӗҫленӗ, халӗ — пенсире, анне вырӑнти фермер патӗнче сыр тăвакан цехра ӗҫлет. Аслисем ҫемье ҫавӑрнă. Пиччӗшӗ экологи енӗпе вӗреннӗ, ӗҫ сыхлавӗн инженерӗ пулса ӗҫлет, аппăшĕ нефть университетӗнчен вӗренсе тухнӑ.

Елена хӑйӗн тӑванӗсенчен тӑрӑшуллӑ, тӳрӗ кӑмӑллӑ пулма, ҫынсене пулӑшма, ҫемьене хаклама вӗреннӗ. Ӑна мӗн ачаранах шӑпа тӑваканӗ çын хӑй тесе ӗнентернӗ, ҫавӑнпа та хӑйне хӑй хаклама пĕлекен, çинетăруллă пулмалла та тӗллев патне каймалла тесе вĕрентнĕ. Воспитани парасси çемьере ҫирӗп пулнӑ, анчах та ҫакӑ лайӑх кăтартусем парать.

— ППЭ виҫӗ предметпа: математика, хими тата вырӑс чӗлхи патăм. Пĕтĕмпе 263 балл пухрăм, математика — 80, хими — 91, вырӑс чӗлхи — 92. Вӗренӳ ҫулӗн пуҫламӑшӗнче эпӗ ҫӳллӗ балл пухас тата сумлӑ вуза кӗрес тесе кашни кун ӗҫлеме ҫирӗп шут тытрӑм, — каласа парать медалистка.

Елена пуҫламӑш классенченех тӗрлӗ конкурссемпе олимпиадӑсене район шайӗнче те, республика шайӗнче те хутшӑннӑ, пур ҫӗрте те малти вырӑнсем йышӑннӑ.

— Спортпа кӑсӑкланма тата баскетболла выляма пуҫласан чи пысӑк та пӗлтерӗшлӗ ҫӗнтерӳсем пуҫланчӗҫ. 2017 ҫул чи асра юлмалли ҫул пулчӗ, мӗншӗн тесен пирӗн хӗрачасен команди шкул историйӗнче пӗрремӗш хут ҫине тӑрсах «КЭС-БАСКЕТ» ӑмӑртусенче пӗрремӗш вырӑна ҫӗнсе илчӗ, — мӑнаҫлӑн каласа парать Елена.

2018 ҫулта вӗренӳ производствин бригади (ун йышӗнче Елена пулнă), VI(XXVI) Республика производство бригадисен слетĕнче çӗнтерӳҫӗ пулса тӑчӗ. Ҫак слетра «Выльӑх-чӗрлӗх ĕрчетессси» номинацире виççĕмӗш вырӑн йышӑннӑ. 2019 ҫулта Елена шкул ачисен республика олимпиадинче çав номинацирех иккӗмӗш степень дипломӗпе наградӑланӑ.

— Эпир хамӑр вӑя хумастпăр тата нимĕн те тумастпӑр пулсан, тӑрӑшмастпӑр пулсан, ҫитӗнӳсем валли активлӑ ӗҫсем тумастпӑр пулсан, ăнăçу пирӗн алӑкран нихӑҫан та шаккамасть, «Акӑ эпӗ те!» тесе çитмест. Хамӑн ҫемьене эпӗ яланах пулӑшса тӑнӑшӑн тав тӑватӑп. Мана ӗненекен аннене чӗререн тав тӑватӑп, ӑслӑ-тӑнлӑ ҫитӗнӳсем, усӑллӑ вӗренӳ тата тӗрӗс воспитани панăшăн тавтапуç, ҫакӑ мана ҫитӗнӳсем тума, йывӑрлӑхсене ҫӗнтерме май парать, — тет хĕр.

— Баскетбол маншӑн кӑмӑл туртӑмӗ е хобби ҫеҫ мар, вӑл маншӑн чылай кирлӗрех. Ку спортпа 5 класран пуҫласа киленетĕп, паллах, ҫав самантра баскетбол ҫинчен нимӗн те пӗлмен. Ильгам Вадутович Газизов тренер пулӑшнипе пирӗн команда ҫирӗп тӗллевпе ҫивӗчлӗхне ӳстерсе пычӗ, — каласа парать Елена.

Елена Петрова вӗренӳ ҫулӗн пуҫламӑшӗнче Пушкӑртстанри чи сумлӑ вуза — УГНТУ вĕренме кĕме тӗллев лартнă. Вара вӑл хӑйӗн тӗллевне пурнӑҫланӑ.

Карина ПАВЛОВА.

Сăнÿкерчĕкĕ: Елена Петрован çемье архивĕнчен.

Тĕплĕнрех «Светлый путь» хаçатра вулăр.