Студент пурнӑҫӗнчен лайӑхраххи мӗн пур?

Кистенлĕ каччи Валерьян Яковлев — Пушкӑрт патшалӑх университечӗн инженери факультетӗнчи тӑваттӑмӗш курс студенчӗ. Вырӑнти шкула «питĕ лайăх» паллăсемпе пӗтернĕ. Валерьян вӗренекен ҫул-йӗре хăй кӑмӑлланӑ, ку малашлӑхлă професси тесе шутлать.

— Студент вӑхӑчӗ вӑл — пурнӑҫри чи интереслӗ тапхӑр, эсӗ вӗҫсӗр-хӗрсӗр нумай ҫынпа паллашатӑн, тем ҫӗннине вӗренетӗн, туссем тупатӑн. Ну, паллах, ку пĕр чарăнми пулакан экзаменсен вӑхӑчӗ те, — каласа парать Валерьян.

Ҫамрӑк ҫын пӗрремӗш икӗ курсра волейболпа тата баскетболпа спорт секцийӗсенче çÿренӗ. Халӗ ун валли вӑхӑт ҫитмест. Вӗреннисӗр пуҫне Валерьян "Додо Пиццăра" ӗҫлеме ӗлкӗрет. Ҫак ҫул унӑн вӗренсе пӗтермелле, УГНТУра малалла вӗренме палӑртать, кӗреймесен ҫара каять. Валерьян хӑй профессийӗпе инженер-материаловед пулса ӗҫлессе е магистратурӑра вӗренекен направленипе ӗҫлессе шанать.

— Паллах, студент пурнӑҫӗ ӗмӗрлӗхех асра юлать. Общежитинчи пурнӑҫ хаваслӑ та интереслӗ, кунта тунсӑхлама вăхăт ҫук, ҫитменнине тата пĕр пÿлĕмре пурăнакансем лайăх çынсем пулсан, пушшех те телейлӗ. Пӗрремӗш курсра Раҫҫей наукисен академийӗн Уфари тӗпчев центрӗнче, физика Институтӗнче тата Раҫҫей наукисен академийӗн кристалсемпе молекулӗсен Уфари центрӗн иртнӗ паллашу практики пулнӑ, мӗншӗн тесен ҫулла тулли локдаун пулнăран, эпир иккӗмӗш курсра пӗтӗмӗшпех тата виççĕмĕш курс çуррине тенӗ пекех дистанци мелĕпе вӗрентӗмӗр. Виҫҫӗмӗш тата тӑваттӑмӗш курсра пирӗн наукӑпа тӗпчев ӗҫӗ. Эпӗ ӑна Раҫҫей наукисен академийӗн Уфари тӗпчев центрӗнче иртетӗп. Пулас студентсене никама та ан итлĕр, хăвăр вăя тата чĕрене кăна ӗненĕр, тесе канаш парас килет, — вӗҫлет Валерьян.

Карина ПАВЛОВА.

Сăнÿкерчĕкĕ: Валерьян Яковлевăн архивĕнчен.

Тĕрплĕнрех «Светлый путь» хаçатра вулăр.