Ленинград блокадине татнине аса илнĕ

Ленинград хулине тăшман çарĕ вăрçă пуçлансанах хупласа илнĕ. 3 миллиона яхăн çын тыткăнри пек пурăннă. Кунĕн-çĕрĕн бомба-снаряд ÿкнĕ. Унтан хăрушă выçлăх çитнĕ. Хула урамĕсенче чĕр-чунсем кăна мар, курăк та юлман. Выçса çитнĕскерсем стена çинчи обоя та çурса çинĕ. Кунсерен çĕршер çын пурнăçран уйрăлнă. Çапла, блокада 871 куна тăсăлнă, пĕтĕмпе 2 млн çыннăн кун-çулне татнă. Çавах та Ленинград чĕрĕ юлнă, темле вăйсăрлансан та тăшмана парăнман.
Эпир ҫав вӑрҫӑ ҫулӗсене нихӑҫан та манас ҫук. Астӑвӑмӑн ӗмӗр сӳнми вут-ҫулӑмӗ ҫутӑ пуласлӑхшӑн ҫапӑҫнӑ паттӑрсемпе паянхи ӑрусене ҫыхӑнтарса тӑрать. Вӑрҫӑ ҫулӗсем ватӑ ҫынсен пурнӑҫӗнче тарӑн йӗр хӑварнӑ – ҫамрӑклӑх пулман, нумайӑшӗ ҫывӑх ҫыннисене ҫухатнӑ, чуна ыраттаракан сурансем юлнӑ...

Ҫавна май пирӗн ҫӗршывра январӗн 20-мӗшӗнчен пуҫласа 27-мӗшӗччен "Блокада ҫӑкӑрĕ" акци иртет. Январĕн 27-мӗшĕнче çав акци шайӗнче Ситек шкулĕнче "Ленинград ачисен куҫӗпе" документлӑ фильм пăхнă тата хӑюлӑх урокӗ ирттернĕ.

"Блокадный Ленинград" квест иртнĕ, командӑсене Хисеп грамотисем панă.

#блокадаҫӑкӑрӗ #ленинград #хӑрушӑвӑрҫӑ #асӑнукаҫӗ

Сăнÿкерчĕкĕ: Сергей Семенов.