Районти шкулсенче вӗренекенсене юнармеецсен ретне йышӑннă

Декабрӗн 8-мӗшӗнче, Тӑван çӗршыв Геройӗсен кунне уявлас умӗн, Пишпÿлекри 2-мĕш вăтам шкулта районти пӗтӗмӗшле пӗлӳ паракан учрежденисенче вӗренекенсем Пӗтӗм Раҫҫейри "ЮНАРМИЯ" общество юхӑмӗн вырӑнти уйрӑмӗн ретне йышӑнмалли чаплӑ церемони иртнӗ.
Ҫав кун Пишпÿлекри 2-мĕш вăтам шкулăн ултă вӗренекенне Пишпÿлекри юнармеецсен ретне илнӗ. Вӗсем 9 "а" класс ачисем. Ҫак кун кашни ҫамрӑк армеецӑн чаплӑ сӑмах калама тивнӗ: яланах Тӑван çӗршывшӑн шанчӑклӑ пулмалла, "ЮНАРМИ" уставне пӑхӑнмалла, паттӑр тата хăюллă пулмалла, юлташла пӗр-пӗрне пулӑшса пымалла, вӑйсӑррисене хӳтӗлемелле, вӗренӳре тата спортра ҫӗнтерӳсем тума тӑрӑшмалла, геройсене асӑнмалла. Юхăм ретне йышӑнас тесе кашни хутшăнакана удостоверени, хӗрлӗ берет тата значок панă.
Ачасене хисеплӗ хӑнасем саламлама килнĕ: администраци пуҫлӑхӗн социаллӑ ыйтусемпе тата кадрсемпе ĕçлекен ҫумӗ А.А. Данилов, Пишпÿлек районӗн ҫар комиссарӗ С.М. Абдуллин, районти Ветерансен совечӗн президиумӗн членӗ, Çапӑҫу ветеранӗсен районти канашӗн председателӗ В.А. Ахметзянов, Ветерансен совечӗн председателӗн заместителӗ Е.И. Андреева, çамрӑксен "Вектор" центрӗн ертӳҫи Э.И. Тикшаева.
Сăнÿкерчĕкĕсем: Пишпÿлекри 2-мĕш вăтам шкулăн социаллă сетьри страницинчен.