Пишпÿлекре июнӗн 28-мӗшӗ уйрӑм кун пулнă!

 

Пирӗн районти шкулсенчен вӗренсе тухакансем шкул тенкелĕпе сывпуллашнине чаплӑ паллӑ тӑваҫҫӗ, ҫитӗннисен пурнӑҫне кӗреҫҫӗ. Ӗнерхи шкул ачисем паян вӗренӳ аттестатне алла илеҫҫӗ. Районти шкулсенче иртекен кӑларӑм каҫӗсем ашшӗ-амӑшӗн савӑнӑҫӗпе, мӑнаҫлӑхӗпе тата шкул пурнӑҫӗн ҫутӑ аса илӗвӗсемпе тулнӑ.

ЕГЭ результачӗсем тӑрӑх 2025 ҫулта Пишпÿлек районӗнчен вӗренсе тухнӑ 18 ача лайӑх паллӑсемпе аттестатсем тата 1-мĕш степеньлӗ «Вӗренӳри уйрӑм ҫитӗнӳсемшӗн» (ылтӑн) тата пилĕк ача «Вӗренӳри уйрӑм ҫитӗнӳсемшӗн» 2-мĕш степеньлӗ (кӗмӗл) медальсем илнĕ.

Чи нумай медалист Пишпÿлекри 2-мĕш вăтам шкулта - тăххăр, Пишпÿлекри 1-мĕш вăтам  шкулта сакăр медалист. Пишпÿлекри 3-мĕш вăтам шкул виçĕ медалиста ҫитӗнтернӗ. Аитри, Хушăлкари тата Усак-Кичури вăтам шкулсенче пӗрер медалист.

Халӗ ҫамрӑксен умӗнче ҫӗнӗ ҫитӗнӳсем патне, хӑйсен професси ҫулне суйлама ҫул уҫӑлать. Эпир кашнинех малта ӑнӑҫу тата ырлӑх кӗтнине ӗненетпӗр!

 

Сăнÿкерчĕкĕсем: Пишпÿлек район администрацин социаллă сетьри страницинчен.