Килти кайӑк – кĕшĕк какай хуплӑвĕ

Хуплӑва çуллӑ аш - какайран тата çатмапа кӑна пĕçереççĕ. Ăшлӑх вырӑнне кĕрпеклĕ пĕçернĕ вир пӑттипе, сайра хутра тулӑ, хуратул, урпа, рис пӑттипе те усӑ кураççĕ. Пуçлӑ сухана чĕрĕлле тураса хураççĕ.

Пысӑк çатма çине хĕрринчен тухмалӑх чуста йĕтĕрлесе хумалла. Ун çине кĕрпеклĕ пĕçернĕ вир пӑтти сармалла, туранӑ пуçлӑ сухан сапмалла, çуса тасатнӑ, вӑтам татӑксемпе вакланӑ килти кайӑк- кĕшĕк какайне, кайӑк- кĕшĕк тукмакĕсене хурса тухмалла, тӑвар сапмалла, çине йĕтĕрленĕ чустапа витмелле, хĕррине илемлĕн чĕпĕтсе тухмалла. Хуплӑва хӑпарма лартмалла, питне лӑканӑ çӑмартапа сĕрмелле, виç – тӑватӑ хут вилкӑпа тирмелле, пĕçерме кӑмакана лартмалла. Хуплу пĕçернĕ чух çатма çине шӑранса тухнӑ çӑва сӑрӑхтарса илмелле. Пиçнĕ хуплӑва кӑмакаран кӑлармалла, питне çу сĕрмелле, хуплу пичĕ çемçе пултӑр тесе, ӑна çур сехете таса пирпе витсе хумалла.

Ҫапла хатĕрленĕ хуплу тĕпĕ тата ӑшĕ витĕр çу çапса пиçет, вӑл питех те тутлӑ пулать.

Хуплӑва ӑшӑлла çиме параççĕ. Хуплӑва сысна е ĕне выльӑх какайĕнчен те пĕçереççĕ.

Читайте нас: