Госпитальсенче аманнисене каллех пулӑшма хатӗр

Хамӑрӑннисене пӑрахмастпӑр!

Пирӗн районти хӗрарӑмсем Галина Скоробогатова, Анна Захарова, Гульгена Садыкова, Марина Яковлева Луганскри госпитальте ӗҫленӗ.
Ҫӗршывра виҫҫӗмӗш ҫул пыракан ятарлӑ ҫар операцийӗ пирӗн пурнӑҫа тӗпрен улӑштарчӗ. Арҫынсем, хӑйсен тивӗҫне пурнӑҫласа, ҫапӑҫу хирӗнче ҫапӑҫаҫҫӗ пулсан, хӗрарӑмсем вӑй ҫитнӗ таран пурне те тума тӑрӑшаҫҫӗ. Февральте пирӗн районти тӑватӑ хӗрарӑм: Галина Скоробогатова, Анна Захарова, Гульгена Садыкова тата Марина Яковлева Луганскри госпитальте ӗҫленӗ.
— Пушкӑртстан Пуҫлӑхӗ Радий Хабиров ҫакӑн пек май пурри ҫинчен пӗлтерсенех, эпӗ ноябрьтех заявлени ҫыртӑм та анкетӑна тултартӑм. Унтан Уфара пире пӗрремӗш пулӑшу пама, урӑхла каласан тактика медицинине вӗрентрĕç. Эпир, ҫичӗ хӗрарӑм, вуннӑмӗш хут кайса, салтаксене ятарлӑ ҫар операцийӗнче вӑйлӑ пулӑшу парас шутпа инҫетри ҫӗршыва кайрӑмӑр. Хампа пӗрле носкисем тата футболкӑсем тултарнă темиҫе рюкзак илтĕм. Эпӗ ятарлă çар операци иртекен зонӑна кайнине пӗлсен, Боголюбовка, Аит ялӗсенчен те япаласем илсе килчӗҫ. Ҫавӑн пекех салтаксене валли кучченеҫсем, баурсак тата ытти те хатӗрлерĕм. Ҫакӑн пек багажпа ывӑл мана Уфана илсе кайрӗ, - каласа парать Гульгена Марвановна.
Ялти хӗр шкулта вӗреннӗ чухне тантӑшӗсенчен нимӗнпе те уйрӑлса тӑман, Уфара ҫӗвӗҫе вӗреннӗ чухне вара спорт кружокне ҫӳренӗ, самбопа дзюдо меслечӗсене вӗреннӗ.
— Тӑван яла таврӑнсан, социаллӑ работник пулса вунвиҫӗ ҫул ватӑ ҫынсене пӑхрăм, унтан ултӑ ҫул Калинин ячӗллĕ ОООра Боголюбовкӑра дояркӑра ӗҫлерĕм. Ӗҫрен пушӑ вӑхӑтра вырӑнти клуба маскировка сеткисем ҫыхма ҫӳреп. Пӗлтӗр манăн районти волонтерсемпе пӗрле Крымра канма тӳр килчӗ. Эпӗ унта чухне ман ывӑл Новороссийскран мӑнуксемпе пӗрле килчӗ, эпир вара виҫӗ кун пӗрле пултӑмӑр. Ҫак мероприятие йӗркелекенсене вӗсем мана ҫакӑн пек асран кайми савӑнӑҫлӑ кунсем парнеленӗшӗн тав тӑватӑп, — тет активистка.
Гульгена Марвановна хӑй тивӗҫлипе мухтанакан ывӑлӗсене пӑхса ӳстернӗ. Унӑн виҫӗ ывӑлӗ те пурнӑҫра хӑйсен вырӑнне тупнӑ, ура ҫинче ҫирӗп тӑраҫҫӗ. Асли Рамиль çар ҫынни, Раççейĕн Хӗҫпӑшаллӑ вӑйӗнче службӑра тӑнӑ, тивӗҫлӗ канӑва тухнӑ. Разит, виҫӗ ача ашшӗ, паян ятарлӑ ҫар операцийӗн зонинче контрактпа ӗҫлет. Чи кӗҫӗнни Игорь Пелепейри медицина колледжӗн студенчӗ.
— Ултӑ ҫул дояркӑра ӗҫленӗ хыҫҫӑн пӗрремӗш хут отпуск илтĕм те госпитале ӗҫлеме кайма шутларăм. Паллах, малтанхи кунсенче кӑшт кӑткӑсрахчӗ. Пӗрремӗшӗнчен, палламан вырӑнсем, иккӗмӗшӗнчен, ку таранччен пысӑках мар сурансӑр пуҫне урӑх нимӗн те курман. Эпир хваттере вырнаҫрӑмӑр та ирхине пилӗк хутлӑ госпитале ӗҫе кайрӑмӑр. Кунта эвакуаци госпиталӗ вырнаҫнӑ, кашни кун аманнисем килеҫҫӗ те, урăх госпитальсене тухса каяҫҫӗ. Колясочниксене регистратурӑрах кӗтсе илеççĕ. Пире, икӗ хӗрарӑма, тӑваттӑмӗш хута ĕçлеме вырнаҫтарчӗҫ. Тепӗр кунне эпӗ перевязочнӑйĕнче ӗҫлерӗм. Салтаксем тӗрлӗ сурансемпе килеҫҫӗ, камӑн алли ҫук, камӑн урисем ҫук, осколоксемпе аманнисем пулсан, вӗсен хӑшпӗрисен, паллах, мĕн те пулин хуҫӑлнӑ. Ӑшчикре йывӑр пулин те, ҫакна палӑртмарăмăр, шӳтлесе хавхалантарма тӑрӑшрăмăр. Яланах процедура кабинетӗнче пултӑм, нумайӑшӗпе туслашрӑм, — тет ырӑ кӑмӑллӑ хӗрарӑм.
Пишпÿлекри Марина Яковлева госпитале ҫитсе аманнисене вӑйлӑ пулӑшу пама пултарнӑшӑн савӑннине пытармасть. Мӗншӗн тесен унӑн упӑшки — "Темир" позывнойлă боец — ҫулталӑк ҫурӑ ĕнтĕ ятарлă çар операцине хутшăнать.
— Тахҫан, ятарлă ҫар операцийӗ пуличченех, упӑшкана вӑрҫӑ пулсан, эпӗ те санпа пыратӑп, пулӑшатӑп тенĕччĕ. Госпитальте ӗҫлеме хӗрарӑм-волонтерсем пухни ҫинчен пӗлсен, манӑн кӑмӑл ҫӗкленчӗ. Госпитальте аманнисем нумай, коридорсенче те выртаççĕ, вӗсен осколоксемпе аманнă суранӗсем ҫеҫ мар, ытти чирсем те пурччӗ, пĕрин вар-хырӑмӗ йывӑрланнă, тепри шӑнса пӑсӑлнă... Малтанхи вӑхӑтра вӗсем выҫӑ та вараланчӑк килеççĕ, ывӑнса ҫитнӗскерсем, сийӗн-сийӗн выртатчӗҫ, унтан ҫывӑрса тӑрансан, вӑй кăштах пухсан столовӑя хăйсемех уксахласа та пулин ҫитетчӗҫ, ку пирӗн чуншӑн бальзам пекчĕ. Эпир вӗсене пӑхаттăмăр, ҫитереттĕмĕр, палатӑсенче тирпейлеттĕмĕр, савӑт-сапа ҫăваттăмăр. Боецсене процедурӑсене, МРТпа УЗИне илсе çÿреттĕмĕр. Кунта ытти поликлиникӑсенчен те
килекенсем пурчĕ, хӑш чухне черетре 40— 50 ҫын пулса каятчĕ. Туртакансене урама тухма пулӑшаттăмăр, ҫавӑн пекех йывӑр чирлисене Ростов-на-Дону хулине ӑсатма пулӑшаттăмар. Боецсем питӗ чӑтӑмлӑ, пӗр-пӗрне пулӑшма тӑрӑшаҫҫӗ, - тет вӑл.
Марина Яковлева вӑхӑтлӑха пӗчӗк ывӑлне Тимерлана асламӑшӗпе аслашшӗ патне хӑварнă, унтан вӗсем телефонпа калаҫнă.
— Эпӗ хампа пӗрле ноутбук илсе кайрăм. Манӑн Пишпÿлекри 2-мĕш вăтам шкулти 3-мĕш тата 4-мĕш классен ачисем ҫырнӑ ҫырусем, ӳкерчӗкĕсем пурччĕ, "Журавушка" ача сачӗ видеосалам хатӗрлесе парса ячĕ. Эпӗ аманнӑ боецсене вĕсене кӑтартрӑм, пурте хĕпĕртерĕç, хӑшпӗрисем макăрса та илчĕç. Госпитальте пулнӑ чухне аманнисене пур майпа та пулӑшма тӑрӑшрăмăр. Эпир волонтерсем иккенне пӗлсен, вӗсем питӗ тав турӗҫ: "эсир килмен пулсан, эпир те чӗрӗ юлман пулӑттӑмӑр", - терӗҫ. Чӑнах та, госпитальте волонтер пулӑшӑвӗ питӗ кирлĕ, пысӑк пĕлтерĕшлĕ, - тет Марина.
Вӗсем кунӗпех ӗҫленӗ, вӑхӑт иртнине те сисмен. Киле таврӑнсан, вӗсем ҫӗрӗпех хӑйсем мӗн курни-илтни ҫинчен калаçнă.
— Киле тухса каяс умӗн, ку февралӗн 23-мӗшӗнче пулчӗ, эпир пурте кашни палатӑна хамӑр этажсене кӗре-кӗре тухрӑмӑр, салтаксене уяв ячӗпе саламларӑмӑр, хамӑрпа пӗрле илсе килнӗ парнесене патӑмӑр. Вӗсем те пире ҫав тери тав турӗҫ. Эпир хамӑр тивĕçсене пурнӑҫланӑшӑн савӑнатпӑр, - теҫҫӗ Пишпÿлек доброволецӗсем.
Мартăн 8-мӗшӗ умӗн район администрацийӗн тата Республика Пуҫлӑхӗн Радий Хабировӑн Тав ҫырӑвӗсемпе пур хӗрарӑм-волонтерне те наградӑланӑ. Тӗрӗслевсем витĕр ӑнӑҫлӑ иртнӗ хӗрарӑмсем хӑйсене чӗнсен, аманнисене госпитальсенче пулӑшма тепре те кайма хатĕр, тесе пӗлтереҫҫӗ.
Ляйля ГУМЕРОВА.
Сӑнӳкерчӗкĕсем: Гульгена Садыкован архивĕнчен.