Тăван халӑх культурин пуянлӑхне тата хӑйне евӗрлӗхне туйса илме

Чӑваш халӑхӗн культура пуянлӑхне, йӑли-йӗркине упраса хӑварас, аталантарас тӗллевпе Чӑваш чӗлхи кунне халалланӑ «Халӑх культурин фестивалӗ» Чăваш Енре ҫулленех иртет.

«Аваллӑх халапӗсем» чӑваш историйӗн кунӗнче шкул ҫулне ҫитмен ачасем виртуаллă мелпе хула музейӗсенче пулӗҫ, калаҫӑва хутшӑнӗҫ, презентаци тата фильм курӗҫ. Педагогсем ачасене чӑваш Паттӑрӗпе паллаштарӗҫ, халӑх вӑййисене выляттарӗҫ.

Дежурнӑй ушкӑнсенче кӗвӗ уявӗсем иртӗҫ. Килте ларакан ачасем вара ашшӗ-амӑшӗпе пӗрле чӑвашла юрӑ шӑрантарса видео хатӗрлӗҫ.

«Ăстасен хули» халӑх ӑстисен кунӗнче тӑван енпе паллашма пулӗ. Педагогсем ачасене чӑваш ал ӗҫне вӗрентмешкӗн дистанци мелӗпе ӑсталӑх класӗ ирттерӗҫ. Ку мероприяти шӑпӑрлансене тӑван халӑх культурин пуянлӑхне тата хӑйне евӗрлӗхне туйса илме май парĕ.

cap.ru сăн ÿкерчĕкĕ.