Николай Плотникова тинех медаль пачӗç

Чӑваш халӑх сайчӗн тӗп редакторӗ Николай Плотников тахçанах Чăваш Ен ертÿçисенчен пысăк чыса тивӗç. Чăваш чӗлхин аталанăвӗпе пуласлăхӗшӗн нумайăшӗ пуш сăмах çаптарнă хушăра вăл шăппăн кăна кирлӗ те пысăк ӗçсем туса хучӗ. Паян эпир интернетра чăваш чӗлхипе усă курма пултарни те унăн тивӗçӗ.

Чăваш халăх сайчӗ пирӗн тусăмăра, Николай Плотникова, Чăваш Республикин Пуçлăхӗн тивӗҫӗсене вӑхӑтлӑх пурнӑҫлакан Олег Николаев Чӑваш автономийӗн 100 çулхи юбилейӗ тӗлне хатӗрленӗ медальпе чыслама йышӑннӑ. Хушӑва Олег Алексеевич апрелӗн 25-мӗшӗнче алă пуснă.

Тӑван чӗлхен пуянлӑхне тӗнчене кӑларас, ӑна çитес ăру валли упраса хӑварас тӗллевпе Николай Плотников пурнӑҫлакан пысăк та пӗлтерӗшлӗ ӗҫе ҫакӑн пек сума суни халиччен пулманччӗ-ха. Чӑваш тӗнчин хастарӗсемшӗн кӑҫалхи Чӑваш чӗлхи кунӗ чылайлӑха çакăнпа асра юлӗ.

«Сувар».