Пишпӳлек районӗнчи чӑвашсен Канашĕн ларӑвӗ иртнӗ

Пишпӳлекри 2-мĕш вăтам шкулта Пушкӑрт Республикин Пишпӳлек районӗнчи чӑвашсен Канашĕн ларӑвӗ иртнӗ.

Мероприятире Канаш президиумӗн членӗсем, ҫавӑн пекех Пишпӳлек районӗнчи чӑваш чӗлхи вӗрентекенӗсем, библиотекарьсем, ача сачӗсен воспитателӗсем пулнă.

Тарават тӗлпулу хыҫҫӑн хисеплӗ хӑнасем полилингваллӑ классен вӗрентекенӗсем ирттернӗ уроксене ҫитсе курнă: 2 «а» класра ӳкерӳ урокне Л.Ф. Гаврилова, 3 «а» класра таврари тӗнче урокне О.В. Сергеева ирттернӗ. Çавӑн пекех вӗсем тӑван чӑваш чӗлхи урокне те ҫитсе курнă, ăна 5-мĕш класра Н.Г. Николаева тата 8 «б» класра историпе акӑлчан чӗлхи полилингваллӑ урокне И.Г. Игнатьева ирттернĕ.

Шкул музейӗн ертӳҫи Е.И. Андреева хӑнасене музей экспозицийӗсемпе паллаштарнă, çавӑн пекех Пишпӳлек районӗнчи чӑваш ялӗсем пуҫланса кайнин историйӗ ҫинчен каласа панă.

Шкул ачисен декоративлӑ-прикладной пултарулӑхӗпе ӳкерчӗкӗсен куравӗсемпе «Талантики» ОДО ертӳҫи Т.Д. Гончарова паллаштарнă.

Чӑваш чӗлхи кунне, çавӑн пекех Раҫҫей Федерацийӗнчи халӑхсен пӗрлӗхӗн çулталӑкне халалланӑ класс тулашӗнчи «Тӑван чӗлхе — халӑх чунӗ» мероприяти пур ӳсӗмри чӑваш чӗлхине вӗреннине кӑмӑлланнисене пухнă. Уявра музыка, хореографи номерӗсене шӑрантарнă, «Татюк» спектакль (шкул театрӗн ертӳҫи З.И. Ахметшина) кăтартнă шкулти ҫамрӑк артистсем кӑна мар, Пишпÿлекри «Дюймовочка» ача сачӗн ҫамрӑк артисчӗсем тата районти Культура керменĕн Л.В. Романова ертсе пыракан районти театр пӗрлӗхӗн членӗсем те тухса калаçнă.

Театр пӗрлӗхӗсен ертӳҫисемпе хутшӑнаканӗсене чӑваш чӗлхине юратма вӗрентнӗшӗн пысӑк тав.

Ҫавра сӗтел ларӑвӗнче общество организацийӗн ҫивӗч ыйтӑвӗсене, чӑваш чӗлхине хальхи пӗрлӗхре тӑван чӗлхе пек вӗренмелли формӑсемпе меслетсене сӳтсе явнă.

Шкул администрацийӗ чӑваш чӗлхине тата чӑваш халӑхӗн историне, этнографине, культурине тӗпчес енӗпе хӑйсен опычӗпе паллаштарнӑ шкул ӗҫченӗсене, ҫавӑн пекех чӑваш чӗлхипе чӑваш культурине малалла вӗренес ӗҫре аталану ҫулӗсене пӗрле палӑртнӑ шкул хӑнисене тав тăвать.

Сăнÿкерчĕкĕсем: Пишпÿлекри 2-мĕш вăтам шкулăн социаллă сетьри страницинчен.

МОБУ СОШ №2 с. Бижбуляк

https://vk.com/bssh2