2020 çул — Шурă Йĕке хÿре çулĕ

Йĕке хÿре – китай гороскопĕнчи пĕрремĕш чĕр чун. Вăл ăс-хакăлпа тата сисĕм-туйăмпа уйрăлса тăрать. Йĕке хÿре – тактик тата стратег‚ çавăнпа вăрттăн та чее чĕр чун пурнăç йывăрлăхĕсене ăнăçлă татса пама пултарать.
Кăçалхи çулăн палли - металл. Шурă металл Йĕке хÿрепе тĕл пулмалли килĕшÿллĕ тĕс - шурă. Металл – çирĕп материал. Вăл çирĕплĕхе‚ кĕрешÿпе вăя‚ хастарлăхпа хăюлăха пĕлтерет. Çакăн йышши Йĕке хÿре аркатайми çирĕп кăмăлпа тĕрĕслĕхшĕн кĕрешет. Шурă тĕс вара тасалăхпа ăслăлăха‚ тĕрĕслĕхе‚ ырă шухăшпа пахалăха палăртать.
Çулталăк символĕ тĕллевсене тĕрĕс çулпа пырса пурнăçлакан‚ тавралăха сыхлакан тата çынсене хисеплекен çынна çеç пулăшса пырĕ. Ыттисемшĕн вăл ăнăçусăр тата пăшăрхануллă кунсем илсе килĕ.

2020 çул епле пулĕ?
Китай гороскопĕ тăрăх‚ Йĕке хÿре çулĕпе металл стихийĕн килĕшĕвĕ тĕллев лартнă тата курнăçлă çынсене ăнăçу парнелĕ. Пуяс тата обществăра çÿллĕ вырăн йышăнас текенсене Йĕке хÿре пулăшĕ. Анчах палăртнă тĕллевсене пурнăçлас тесен çын ĕçе пĕтĕмпех парăнмалла.
Йĕке хÿресем — лайăх ăс-тăнлă чĕр чунсем. Вĕсем пĕчĕк пулăмсене асра тытма‚ кирлĕ вăхăтра ăс-тăнри паха информаципе усă курма тата пĕр харăс темиçе ĕç тума пултараççĕ. Ыттисенчен те çавнах кĕтеççĕ.
Çулталăк хуçине хирĕç пыма тата çĕнĕлле ÿкĕте кĕртме май çук. Йĕке хÿре харпăр хăй шухăшĕсене çирĕп хÿтĕлет. Хăш чухне эгоизм тени те палăрать. Çавăнпа çĕнĕ çулта çак уйрăмлăхпа кĕрешмелле, унтан хăтăлма тăрăшмалла.
Йĕке хÿре — юратупа тимлĕх символĕ. 2020 çулта хăвăра савакан çынсемпе çеç хутшăнăва кĕмелле. Юрату символĕ çынсем пĕр-пĕринчен пĕр-пĕр япалана пытарнине юратмасть. Хутшăнура тÿрĕлĕх малта пулмалла. Çавăн чух çеç телейлĕ те вăрах юрату пулĕ. Çулталăк палли‚ металл‚ таврари çынсен кăмăлĕсем сивĕ пулнине, ыттисемпе хутшăнма васкаманнине уçса парать. Çавăнпа та çынпа паллашасси вăраха тăсăлĕ.
Сывлăх енчен илсен‚ 2020 çул пурне те савăнтарĕ. Экспертсем хастар тата спортпа туслă пулма‚ комфорт зонинчен тухма сĕнеççĕ. Çаксене пурнăçласан кăмăл çĕкленĕ‚ сывлăх лайăхланĕ.
Çĕнĕ 2020 çула епле кĕтсе илмелле?
Йĕке хÿре пур пурлăха хăйĕн йăвине сĕтĕрет пулсан та‚ вăл çуртра ытлашши япаласемпе ăпăр-тапăр пуррине ырламасть. Çĕнĕ çула кĕтсе илес умĕн хваттере тасатса тухмалла: мĕнпур çуп-çапран хăтăлмалла‚ кантăксене çумалла. Вĕсенчен пÿрт ăшне çутă кĕрет.
Шăшисем хăтлă «йăвасем» юратнине шута илсе Çĕнĕ çул уявне килте‚ çемьепе ирттерсен аван. Тепĕр енчен‚ Йĕке хÿре — кĕтӳпе çÿреме юратакан чĕр чун. Кичеме юратмасть. Çавăнпа Çĕнĕ 2020 çула шавлă ушкăнпа кĕтсе илсен те вырăнлă пулĕ.
2020 çулăн хуçи сăрă‚ шурă тата хура тĕссем кăмăллани паллă. Кил таврашне илемлетнĕ тата хăвăра валли тум хатĕрленĕ чух çак палитрăна шута илмелле. Металл подвескăсемпе илемлĕ хăлха çаккисем‚ çутă брошкăсем Йĕке хÿре кăмăлне кайĕç. Интерьера илемлетнĕ чухне те куçа шартарман тĕссене шута илмелле. Унсăр пуçне экоматериалтан тунă япаласене декор валли усă курсан та лайăх пулать.

Сĕтел уявне хатĕрленĕ вăхăтра çулталăк хуçин хăйне евĕрлĕ хушăвĕсене пăхăнмалла. Йĕке хÿре — пур апата та çиекен‚ лайăх аппетитлă чĕр чун. Çавăнпа уяв сĕтелĕ пуян пулмалла. Çĕнĕ çул хуçине кÿрентермессе экзотика апачĕ пачах та пулмалла мар. Уяв сĕтелли çине ансат та тутлăхлă апат лартмалла. Сумлă вырăнта сыр пулмалла. Тĕп атрибут Çĕнĕ çулăн хуçине сирĕн енне çавăрма пулăшĕ.

https://ursas.rbsmi.ru/