Тӑван çӗршыв интересӗсен хуралĕнче тӑрать

Ҫамрӑк ҫынсен пурнӑҫӗнче пӑлхануллӑ самант ҫитет, ку вӑл Тӑван çӗршыва сăваплă парӑм пама — ҫарта служит тума вӑхӑт ҫитнине пӗлтерет. Ҫак самант пӗлтӗрхи ноябрь уйӑхӗнче Игнашкино ялӗнчи Сергей Васильевшӑн та ҫитнӗ. Виҫҫӗмӗш уйӑх ӗнтӗ пирӗн ентеш хисеплӗ те сăваплă ӗҫ илсе пырать — Тӑван çӗршыв интересӗсен хуралĕнче тӑрать.

Сергей Игнашкино ялӗнче ӳснӗ. Михайловкăри вӑтам шкултан вӗренсе тухнӑ. Ачаранпах ӳкерчӗксемпе интересленнӗ, шкулта вара ун ҫинчен учительсем: "Класӑн кӑмӑлӗ", "Пирӗн позитивчик", тесе каланă. Шкул хыҫҫӑн Уфари наукӑпа технологисен университечӗн географи факультетне вӗренме кӗнĕ. Аслӑ пӗлӳ илнӗ хыҫҫӑн ҫирӗп йышӑннӑ —Тӑван çӗршыва умĕнчи тивĕçе пурнăçламалла. Сергее 2023 ҫулхи ноябрӗн 20-мӗшӗнче ҫара чӗннӗ. Волгоград облаҫӗнчи Камышин хулинче, Берлин Дон Казакӗн 33-мӗш мотострелковӑй полкӗнче службӑра тӑрать.

Служба хӑй черечӗпе пырать. Паллах, каччӑ хӑйӗн ашшӗ-амӑшне манмасть: службӑран пушӑ вӑхӑтра салтаксен кулленхи пурнӑҫӗ ҫинчен каласа пама, шӑнкӑравлама тӑрӑшать.

Виҫӗ уйӑх службӑра. Ку ытла пысӑк срок та мар пулас, анчах Сергей ҫар коллективне хӑвӑрт хутшӑннă та салтаксен кӑткӑс ӗҫне малалла вӗренсе пырать. Паллах, ҫарта мӗн вӗрентни малашне кирлӗ пулӗ.

Неля САБАХОВА.

Сӑнӳкерчӗкĕ: Сергей Васильевӑн архивӗнчен.