Хамăр патра кăларнă продукцие суйласа ил!

2018 çултанпа Пушкăртстан Республикинче ялхуçалăх кооперативĕсем уçма пулăшассипе хастар ĕç илсе пыраççĕ. Пулăшăвăн тĕсĕсенчен пĕри — «доходогенерирующи проектсем» валли грант уйăрасси.

Пирĕн районта икĕ çул тăршшĕнче сакăр кооператив çакнашкал пулăшупа усă курнă. «Пишпÿлекри информаципе консультаци центрĕн» директорĕпе Айнур Абзаловпа «Бижбулякские яства» СПоК ĕçĕ-хĕлĕпе паллашатпăр.

Çурмафабрикатсем тăвакан цехра пире кооператив председателĕ Флюза Бурангулова кĕтсе илчĕ.

— Ялта пĕччен ĕçлесе пулмасть. Çавăнпа та пĕлтĕрхи июльте эпир (13 пайщикпа пĕрле) «Бижбулякские яства» уçрăмăр, — тет Флюза Наилевна. — Цехра пельмень, манты, тефтели, катлет тата ытти продукци кăларатпăр. Виçĕ çын производствăра тата водитель-экспедитор вăй хураççĕ. Чустине хамăр çăратпăр, какайне Биккулпа Каныкай ялĕсенчи пайщиксем тăратаççĕ.

2,3 млн. тенкĕлĕх грант укçипе электричество мясорубки, чуста хуташтаракан машина, сĕтелсем, виçесем, пельмень аппарачĕ, кăлпасси шприцĕ, сивĕтмелли шкапсем, çумалли ваннăсем тата ытти кирлĕ оборудовани туяннă.

— Продукцие Пишпÿлекри «Идель», «Огонек», «Добрый день» лавккасенче, Пелепей, Приютово и Пономаревкăра сутатпăр, — ăнлантарать Флюза Бурангулова. — «Lada Granta» автомобиль çине лартнă фургон продукцие турттарма пулăшать.

Владимир СМОЛОВ.

Сăнÿкерчĕкĕ: Владимир СМОЛОВ.