Путин криптовалюта енĕпе йĕрке кĕртмелли пирки каланă

Раҫҫей Президенчӗ Владимир Путин ҫӗршыври криптовалютăна йӗркелесе пымалли темӑпа дискуссисемпе паллашни ҫинчен пӗлтернӗ. Кун пирки патшалӑх пуҫлӑхӗ юнкун, январӗн 26-мӗшӗнче, правительство членӗсемпе канашлура каланă.

"Ку ыйтупа пыракан дискуссипе паллашрăм, ҫак ыйтусемпе пирӗн Раҫҫей Федерацийӗн Тӗп банкӗ йӗркелесе пырать", — палӑртнă Путин.

Раҫҫей лидерӗ Раҫҫей Банкне тата правительствӑна криптовалюта йӗркелес тӗлӗшпе пӗр шухӑш патне пыма, унтан итогсем ҫинчен каласа пама хушнă.

Кунччен маларах Патшалăх Думин депутачӗ Анатолий Аксаков палӑртнӑ тӑрӑх, парламентӑн аялти палати криптовалюта рынокне йӗркелеме палӑртнӑ документа июлӗн 31-мӗшӗччен йышӑнма пултарать.

Тĕп Банк кӑрлачӗн 20-мӗшӗнче Раҫҫейри юридика сăпачĕсене тата уйрăм ҫынсемшӗн тӳлев вырăнне криптовалютăпа усӑ курма чарнине пӑснӑшӑн яваплӑх тыттарассине кĕртме сӗннӗ. Ҫавăн пекех Тĕп Банк финанс организацийӗсене хӑйсен укҫи-тенкине криптовалютăна хывма тата вӗсемпе ҫыхӑннӑ инструментсене хума чарма сӗннӗ.

Криптовалютăпа блокчейн Ассоциаци президенчӗ Юрий Припачкин палӑртнӑ: Тĕп Банкăн криптовалюта ҫаврӑнӑшне тӗрӗслесе тӑма вӗренмелле, ăна пĕтĕмпех чарса хумалла мар.

Криптовалюта рынокӑн аналитикӗ Виктор Першиков криптовалюта майнингне чарса хурасси питӗ кирлӗ ыйтупа ҫыхӑннӑ тата ӑна асӑннӑ енӗпе специалистсемпе сӳтсе явмалла тенӗ. Вӑл Раççей ҫакӑн ҫине каясси ҫинчен тĕплĕ калама хатӗр маррине палӑртнă.

 «Известия» информацийĕпе.

Сăнÿкерчĕкĕ: ИЗВЕСТИЯ/Зураб Джавахадзе