«Крутой замес» - тутăпа йӑла-йӗрке тӗл пулакан вырӑн

Ҫамрӑк предприниматель Марина Кудряшова тăрăшнипе Пишпÿлекре апат-ҫимӗҫ кӳрекен пӗр точкă ытларах пулчӗ.
— Манӑн ĕçлĕ ҫул ҫемье ресторанӗнче повар пулса ӗҫленинчен пуҫланчӗ, ҫавӑн пекех пӗр вӑхӑт Пишпÿлекри пӗр шкулти столовӑйра питӗ лайӑх хӗрарӑмсемпе ӗҫлерӗм, вӗсенчен питӗ пысӑк опыт илтӗм, - каласа парать «Крутой замес» хуҫи Марина Кудряшова. - Манӑн пурнӑҫри вунă ҫула яхӑн «Мир вкуса» кафере иртрӗ, унта эпӗ Наиля Файзуллинаран тӗрев туйса малашлӑх плансем турӑм. Анчах та вӑхӑт иртнӗҫемӗн манӑн мӗн те пулин пысӑкрах япала тӑвас, хамӑн шухӑшсене лайӑхлатнӑ евӗр пурнӑҫа кӗртес шухӑш ҫуралчӗ. Ҫапла майпа «Крутой замес» проект ҫуралчӗ, вӑл манӑн пӗтӗм опыта пухрӗ, пӗрмай вӗренес, ӳсес туртӑм, ҫавӑн пекех пултарулӑх валли виҫесӗр ирӗклӗх пухрӗ.
«Крутой замес» апат-çимĕç кӳмелли точка кӑна мар, вӑл тутăпа йӑла-йӗрке тӗл пулакан вырӑн. Марина апат-çимĕçсене тӗплӗн суйласа илет, вырӑнти фермер хуҫалӑхӗсене кӑмӑллать, ингредиентсен ҫӗнӗлӗхӗпе пахалӑхне шантарать. Ассортиментра - алӑпа ӑсталанӑ пельменьпе пӳремеч, равиоли, килте тунă салма, тӗрлӗ ăшлă тултарнӑ кукӑль, типӗтнӗ какай, аш соусӗсем, лазанья тата ытти те. Ҫаксене пурне те хӑйсен ҫемйишӗн тунӑ пек юратса, тӑрӑшса тӑваҫҫӗ.
Ҫурмафабрикатсемсӗр пуҫне «Крутой замесра» уяв сӗтелӗ валли хатӗр апат-ҫимӗҫӗн анлӑ суйлавне саккас пама пулать. Кунта сире кирек мӗнле уяв валли те меню хатӗрлеме пулӑшӗҫ, ҫуралнӑ кун-и вӑл, юбилей-и е туй-и, е корпоратив-и. Марина сирӗн валли салатсем, закускӑсем, вӗри апатсемпе десертсем хаваспах хатӗрлӗ, вӗсем сирӗн хӑнасене тӗлӗнтерӗҫ, савӑнтарӗҫ.
«Крутой замесра» уйрӑмах чей ҫине тимлӗх уйӑраҫҫӗ. Кунта Пишпÿлек районӗнчи тивлетлӗ ҫӗр ҫинче пухнӑ техӗмлӗ курӑк пуххисене туянма пулать. Ҫак чейсем илемлӗ тутӑллӑ кӑна мар, сывлӑхшӑн та усӑллӑ.
Ҫывӑх вӑхӑтра Марина тӗрлӗ апат-ҫимӗҫ хатӗрлес енӗпе ӑсталӑх класӗсем ирттерме палӑртать. Ку - ҫӗннине вӗренме, пӗр шухӑшлӑ ҫынсен ушкӑнӗнче вӑхӑта кӑсӑк ирттерме питӗ лайӑх май. «Крутой замес» ахаль лавкка кӑна мар, тутлӑ ҫиме юратакан, килти апат-ҫимӗҫ йӑли-йӗркине хаклакан пуриншӗн те туртӑну центрӗ пулма тӑрӑшать.
- Шухӑш çын килсе пӗр вырӑнта уявсем ирттерме апат-ҫимӗҫ саккас пама пултарасси, килте туса илнӗ ҫурмафабрикатсем туянасси, хамӑр район уй-хирӗнчен пухнă техӗмлӗ чейсем туянасси, ҫӗнӗ позицисем тутанса пӑхасси. Ҫавӑн пекех ӑсталӑх класӗсем ирттерме май пур, - паллаштарать Марина Владиславовна.
Марина йывӑрлӑхсенчен хӑрамасть, ӑна пур ҫывӑх ҫынни те пулӑшать-ҫке, вӗсене пула ҫеҫ унӑн веҫех пулать. Упӑшкипе вӗсем икӗ ывӑл ҫитӗнтереҫҫӗ.

Галина ВАРИКОВА.
Сӑнӳкерчӗксем: Марина Кудряшован архивӗнчен.

Пушкӑртстан социаллӑ предпринимательлӗхе аталантарас енӗпе Раҫҫейре малта пырать — 618 единица 2024 ҫул тӗлне. 2021 ҫултан пуҫласа 2024 ҫулччен ПР Предпринимательствӑпа туризм министерстви сывлӑх енчен хавшак ҫынсене пулӑшас проектсем валли пӗтӗмӗшле 203 млн тенкӗлӗх 433 грант уйӑрнӑ. Регионти МСП секторӗнче 593,3 пин ҫын ӗҫлет, ку наци проекчӗпе тӗллевлӗ кӑтартуран 20% пысӑкрах. Республикӑн пӗрлештернӗ бюджетне кӗрекен налук укҫи 22 миллиард тенкӗпе танлашнӑ.

Кейтеринг вӑл - тухса ҫӳрекен обществӑлла апатлану организацийӗ, унта заказчик суйласа илнӗ кирек хӑш вырӑнта та апат-ҫимӗҫ хатӗрлесси, ҫитересси тата ӑна пӑхса тӑрасси кӗрет. Вӗсем корпоративсем, банкетсем, фуршетсем, кофе-брейксем, пикниксем, офиса апат ҫитересси тата апатлану ӗҫне професси тӗлӗшӗнчен йӗркелеме ыйтакан ытти мероприятисем пулма пултараҫҫӗ. Пулӑшу тĕсĕсене меню хатӗрлессине те кӗртме пултарать.