Мĕнпур тĕрĕслеве, мĕнпур ĕметсене çурмалла пайланă

Ял клубĕнче «ылтăн» мăшăрсене — Петр Ивановичпа Валентина Прохоровна Сидоровсене тата Михаил Матвеевичпа Галина Ильинична Леонтьевсене мăшăрланнăранпа 50 çул ятпа чысларăмăр. Уява çемьесен тăванĕсем, çывăх çыннисем, ырă тус-юлташĕсем пухăнчĕç.

Пăслăк ял Совечĕ ял тăрăх пуçлăхĕ Юрий Александрович Васильев хисеплĕ юбилярсене саламларĕ, вăрăм ĕмĕр, ырлăх-сывлăх суннă. ПР Пуçлăхĕн Радий Хабировăн ятĕнчен Тав çырăвĕсем тата парнесем пачĕ. Сидоровсемпе Леонтьевсем çинчен Пăслăк ял Советĕнчи ветерансен совечĕн председателĕ Валерий Николаевич Федоров, ял Совет депутачĕ Татьяна Георгиевна Кириллова тата ыттисем каласа пачĕç.

Пăслăкра çуралса ÿснĕ упăшкипе арăмĕ Петр Ивановичпа Валентина Прохоровна Сидоровсем тăватă ача çитĕнтернĕ, вĕсен çичĕ мăнук тата мăнукĕсен икĕ ачи ÿсет. Аслă ывăлĕ Алексей Петрович Раççей Хĕçпăшаллă вăйсенче контрактпа служба иртнĕ чух мир тăвакан миссипе Балканри хирĕçтăрăва хутшăннă. Кĕçĕнни — Сергей Петрович, опытлă çар çынни пулнă май, 2018 çулта Сиринче пулнă. Сидоров пĕртăвансен правительство наградисем пур.

Михаил Матвеевичпа Галина Ильинична Леонтьевсем иккĕш те Давлекан районĕнчен. Пăслăка ĕçлеме направленипе килнĕ. Михаил Матвеевич ĕмĕр тăршшĕпе выльăх-чĕрлĕх ĕçĕнче вăй хунă, Галина Ильинична тивĕçлĕ канăва тухиччен вырăнти вăтам шкулта биологи тата акăлчан чĕлхи вĕрентнĕ. Çемье пуçĕ графикăпа киленет, чаплă анималист. Мăшăрĕ çамрăк чухне «Аэрофлот» стюардесси пулма пысăк конкурс суйлавĕ иртнĕ, анчах унăн амăшĕ чирленине пула сывлăш çинчен ĕмĕтне пăрахăçлама тивнĕ.

Мероприятие Светлана Трофимова ертсе пыракан «Çăлкуç» фольклор ансамблĕ, «Тăван кĕвĕсем» юрă ансамблĕ илем кÿчĕç.