Ялти чи лайӑх полици уполномоченнӑйӗ

Ноябрӗн 21-мӗшӗнче Уфа хулинчи Совет площадӗнче республикӑри полицин участокри чи лайӑх уполномоченнӑйӗсене наградӑланă. Пишпÿлек районӗнчи ОМВД полицийӗн участокри уполномоченнӑйӗ Вячеслав Николаевич Тикшаев та наградӑна тивӗҫнӗ.

Кӑҫал полицин участокри уполномоченнӑйӗсен служби йĕркĕленнĕренпе 101 ҫула паллӑ тӑваççĕ. Професси уявне чысласа Пушкӑрт Республикин Пуҫлӑхӗ Радий Хабиров, республикӑри Шалти ӗҫсен министрӗ полицин генерал-лейтенанчĕ Александр Прядко, ПР МВД ҫумӗнчи Общество Совечӗн председателӗ отставкӑри милици генерал-лейтенанчӗ Рафаил Диваев, ОВД ветеранӗсен Раҫҫейри общество организацийӗн регионти организацийӗн председателӗ отставкӑри милици полковникӗ Ришат Юсупов, республикăн подразделенийӗсен министрӗн заместителӗсемпе ертӳҫисем хутшӑннӑ.

Малтан хисеплӗ хӑнасем Раҫҫей Федерацийӗн геройӗн Минигали Шаймуратов палӑкӗ умне чечексем хунă.

Пушкӑрт Республикин Пуҫлӑхӗ Радий Хабиров полицин участокри уполномоченнӑйӗсене професси уявӗпе саламланă. Кӑҫал республикӑри полицин участокри уполномоченнӑйӗсем хушшинче конкурс иртнӗ. Вячеслав Николаевич Тикшаева "Пушкӑрт Республикинчи полицин участокри чи лайӑх уполномоченнӑйӗ" номинацире чи лайӑххисенчен пӗри тесе йышӑннӑ.

Ирина Фомина.