Ольга тата Анна Даниловасем пултарулăх тата музыка çул-йĕрне суйласа илнĕ

Ольга тата Анна Даниловасем культура сферине чун туртнипе килнине шанаççĕ. Ачаранах юрлама, ташлама юратнă, çавăнпа мĕнле професси суйласа илесси пирки вăрах пуç ватман темелле. Кăçал Ольга ĕçлеме пуçланăранпа 15 çул çитнине, Анна — 10 çул çитнине палăртаççĕ.

Даниловасем Узбекистанри Кувасай хулинче çуралнă. 1995 çулта çемье ашшĕ çуралнă яла — Йалпăлака куçса килнĕ. Ун чухне Оля 10 çулта, Анна улттăра пулнă. Денис пиччĕшĕ те вĕсен творчествăлла çын. Шкул пĕтернĕ хыççăн Ольга Октябрьскинчи музыка училищинчи вырăс халăх хорĕ факультета вĕренме кĕнĕ, унтан «питĕ лайăх» паллăпа вĕренсе тухнă. Тепĕр тăватă çултан Анна та çавăнтах ăс пухма пуçланă.

2005 çулхи августра Ольга Викторовна Пишпÿлекри Культура керменĕнче коллектив ертÿçи пулса ĕçлеме пуçланă. Уйăх иртсен вăл ертсе пыракан «Чĕрĕ шыв» жюри умне «По зеленой травушке» вырăс халăх юррине тăратсан, коллективăн пуласлăхĕ ăнăçлă пулни паллă пулнă. «Чĕрĕ шыв» творчествине аталантарса, хитрелетсе пынă.

«Весенняя капель» район конкурсĕнче 1-мĕш вырăн йышăнса, коллектив республикăра ирттерекен мĕнпур конкурссене хутшăннă теме пулать. 2008 çулта ансамбль Мускава çул тытнă, унта «Москва-Агидель транзит» IV Пĕтĕм Раççей конкурсĕнче Пишпÿлек район чысне хÿтелесе I степень диплома тивĕçнĕ. Унтан коллектив пĕр çитĕнÿ хыççăн тепĕр çитĕнÿ тунă. Чехине «Цветущая Чехия-2010» Пĕтĕм тĕнчери музыка фестивалĕнче III степень диплом илнĕ. Ольга ĕçленĕ май, Челябинскри культурăпа искусство Академинчен куçăн мар вĕренсе тухнă.

— Çак профессие суйласа илнишĕн пĕрре те ÿкĕнмен. Ĕçпе пурăнатăп, творчествăпа сывлатăп, çĕнĕ шухăшсемпе канатăп — çакă манăн пурнăç, — йăл кулать Ольга.

Анна вĕренсе пĕтернĕ хыççăн малтан Пăслăкри культура çуртĕнче вăй хунă. Каярахпа Пишпÿлекри Культура керменне куçнă, ачасен «Журавушка» коллективне ертсе пыма пуçланă. 2014 çулта Ольга декрета кайсан, «Чĕрĕ шыв» коллективне йăмăкне шанса хăварнă.

Ольга тата Анна «Чĕрĕ шыв» коллективăн аслă ушкăнĕн солисчĕсем (сăмах май каласан, çак коллективăн ултă ÿсĕм категорийĕ пур). Анна — автоклуб заведующийĕ тата культорганизатор.

Ĕçре пĕрмай пулнине пăхмасăр, пĕртăвансем çывăх çыннисем валли вăхăт тупаççех. Ашшĕпе амăшне чунне парса тимлĕ пăхаççĕ, куллен пулăшаççĕ. Ольгăн Злата хĕр пĕрчи ÿсет, Аннăн — Ярослав ывăлĕпе Варвара хĕрĕ. Ачасем халех сцена çине тухаççĕ, ахăртнех, амăшĕсен пултарулăхĕ вĕсене те куçать.

Айгуль ГАРЕЕВА.

Сăнÿкерчĕкĕ: Айгуль ГАРЕЕВА.