Хавхалантарса яракан концертсем

Пишпÿлекри Культура керменĕн "Мерчен" халӑх фольклор ансамблӗ район тӑрӑх концертпа ӑнӑҫлӑ ҫӳрет. Йăлпăлакпа Хушăлкара ӑшӑ та эмоциллӗ концертсем иртнĕ. Театрализациленӗ концерт программинче чӑваш халӑх юррисемпе хальхи композиторсен юррисем. Куракансем Виктория Мордвиновапа Александра Николаева солистсен тата ансамбль юррисене ӑшшӑн кӗтсе илеҫҫӗ. Пишпÿлекри Халăх театрĕн артистки Марина Яковлева тухса каланă чухне вӗсем кулӑшла монологсене те хавхаланса йышӑнаҫҫӗ. Баянпа ӑста выляса пурне те Раиль Рустамович Едиханов аккомпаниатор савӑнтарать. Валентина Петрова "Я берёзка..." сăвва вуланă чухне концерта пыракансем сывлама чарӑнса итлеҫҫӗ (авторӗ Ольга Суздаль). Чӑваш юррине юрлакан ҫамрӑксен "Кĕмĕл сасă" (Шупашкар хули) регионсен хушшинчи конкурсӑн лауреачӗ - Екатерина Емельянова концерт программине ҫутӑ сӑрӑсем кӗртет. Ансамбль çитес вӑхӑтра кӳршӗ района кайма палӑртнӑ.

Сăнÿкерчĕкĕсем: Пишпÿлекри Культура керменĕн социаллă сетьри страницинчен.