Ылтӑн мар-ши эс, анне?

Юрий Сементер. Сăвă.
Ылтӑн мар-ши эс, анне?
Кӗмӗл мар-ши эс, анне?
Ылтӑн пек, ай, хаклӑ-ҫке,
Кӗмӗл пек, ай, сумлӑ-ҫке.
Ылтӑнран та пахарах,
Кӗмӗлрен те сумлӑрах.
Ҫӑлтӑр мар-ши эс, анне?
Уйӑх мар-ши эс, анне?
Ҫӑлтӑр пек хӗлхемлӗ-ҫке,
Уйӑх пек илемлӗ-ҫке.
Ҫӑлтӑртан хӗлхемлӗрех,
Уйӑхран илемлӗрех.
Шӑпчӑк мар-ши эс, анне?
Е саркайӑк эс, анне?
Ҫут хӗвел, чечек, ахах –
Ырлама ҫитмест сӑмах.
Эс нимрен те лайӑхрах,
Пуринчен те хаклӑрах.