Тав сана, тăван анне

Сăвă авторĕ - Сăкăт Ванькки.
Тав сана, тăван анне,
Ырлăх куртăмăр санне —
Хăв çимесĕр хăш чухне
Çитерсе ачусене.

Тав сана, тăван анне,
Юрату сан кашнине:
Хĕвел пек ăшшăн пăхса
Кунĕн-çĕрĕн йăпатса.

Тав сана, тăван анне,
Çук манма каланине:
Ăшă-çутă Хĕвелре,
Ырă — хаксăр аннере.

Тав сана, тăван анне,
Çитĕннĕ ачусене
Эс пăхан сăпкари пек,
Хăв шыран пирте тĕрек.

Тав сана, тăван анне,
Пирĕншĕн эс чăн парне.
Çакă çутă Тенчере
Пĕр — Хĕвел, анне — пĕрре.

Тав сана, тăван анне,
Вăхăт иртрĕ. Сив çилпе
Евĕр тайăлнă пӳпе
Парăнмастăн чир-чĕре.

Тав сана, тăван анне,
Хăв çуратнă «чĕпсене»
Эс вĕçтертĕн инçете
Сывлăх, ăнăç пиллесе.

Тав сана, тăван анне,
Ачусен ачисене
Халь кĕтетĕн эс киле
Хаклă аттепе пĕрле.
Чи çутă çăлтăр