Аитра вĕренекенсем ку чухнехи чи çĕнĕ оборудованипе усă кураççĕ

— Аитри Фатих Карим ячĕллĕ вăтам шкулта «Точка роста» вĕрентÿ центрĕ кĕртнĕренпе ачасен, вĕрентекенсен, ашшĕ-амăшĕн, шкулăн пурнăçĕ палăрмаллах улшăнчĕ, — каласа парать шкул директорĕ Ильмир Рашитович Шафиков. — Халĕ технологи, информатика тата пурнăç хăрушсăрлăхĕн урокĕсенче ачасем ку чухнехи методикăпа вĕренеççĕ. Шкул ачисен класс тулашĕнчи занятисенче те вĕр çĕнĕ оборудование алла илме май пур. Ачасем шахмат, роботехника никĕсĕсемпе паллашаççĕ, 3D моделировани тата программировани вĕренеççĕ, квадрокоптерпа усă курма хăнăхаççĕ, виртуаллă чăнлăхра пулса курма пултараççĕ, пуçламăш медицина пулăшăвĕ пама вĕренеççĕ.

Пĕтĕм ĕçе дистанциллĕ вĕрентÿ иртнĕ опытлă педагогсем — информатика вĕрентекенĕ, центр ертÿçи Салима Аминева, математика учителĕ Райса Гайнутдинова, ОБЖ учителĕ Фидаиль Хасанов, технологи учителĕ Фарит Ахметзянов, географи учителĕ Зульфия Шафикова илсе пыраççĕ.

— Шахмат никĕсне алла илме шкулти мĕнпур ачасене явăçтарнă. Кĕçĕн классенче Роза Нуретдинова, Гузель Арсланова, Зилара Ришатова занятисем ирттереççĕ, 5 —11 классенче вĕренекенсемпе эпĕ ĕçлетĕп, — тет хушма вĕрентÿ программин педагогĕ, шкулти «Белая ладья» шахмат тĕпелĕн ертÿçи Зульфия Бариевна Шафикова. — Турнирсемпе ăмăртусем куллен иртеççĕ. Яланхи çĕнтерÿçĕсем Ильнар Сабахов, Алмаз Галиев, Ильдар Шамаев, Ильнара Бикмухаметова, Алия Валиева, Даниэль Аюпов, Рамазан Башаров.

Компьютер класĕнче информатика учителĕ Салима Аминева вĕрентет.

— Занятисем ачасене питĕ килĕшеççĕ. Эпир тĕп ĕç-хĕлсĕр пуçне квадрокоптерпа усă курма, 3D принтерпа пичетлеме, цифрлă фотоаппаратсемпе ĕçлеме вĕренетпĕр. 9 класра вĕренекен Вадим Вахитов Skratch программированипе киленет, унпа усă курса вăл хăйĕн вăййине шухăшласа кăларчĕ, — тет Салима Габдрашитовна.

Технологи учителĕ Фарит Тимергалиевич каласа панă тăрăх, кĕçĕн классенче вĕренекенсемпе эрнере виçĕ хут икшер сехет занятисем ирттереççĕ. Ачасем LEGO-конструированипе ĕçлеççĕ. Çакă ачасен ăс-тăнне аталантарма, пĕрле коллективпа хăвăрт ĕçлеме пулăшать.

Пĕр сăмахпа каласан, шкулта ачасен проект пултарулăхне аталантарма мĕнпур условисем туса панă, икĕ—виçĕ çул каярах унашкалли пирки ял ачисем ĕмĕтленме кăна пултарнă пулĕ.

Айгуль ГАРЕЕВА.

Сăнÿкерчĕкĕ: Айгуль ГАРЕЕВА.