Пушкӑрт райцентрӗнче поликлиника тӑвасси вӗҫленет

#наци проекчĕ

Виçĕ хутлӑ 320 çын йышăнакан поликлиника тӑвасси Кушнаренково ялӗнче вӗҫленет. Хальхи вӑхӑтра кунта шалти отделка пырать, медицина учрежденине оборудованипе пуянлатаҫҫӗ. Поликлиника тӑвассине "Сывлӑх сыхлавӗ" наци проекчӗн "Сывлӑх сыхлавӗн пуçламăш сыпăкне çӗнетесси" регион проекчĕн шайӗнче пурнӑҫлаҫҫӗ. Паянхи куна хатӗрлӗхӗ 79 процентпа танлашать, ӗҫсене октябрь уйӑхӗнче вӗҫлеме палӑртнӑ, пӗлтерет ПР Строительство министерствин пресс-служби.

 

Строительствӑсӑр пуҫне подрядчик ҫывӑхри территорие хӑтлӑх кӗртессине пурнӑҫланӑ. Объектӑн пӗтӗмӗшле лаптӑкӗ 5 пин тӑваткал метр. Ҫӗнӗ поликлиникӑн пӗрремӗш хутӗнче рентгенодиагностика уйрӑмӗ тата пӗтӗмӗшле пӳлӗмсем вырнаҫӗҫ. Иккӗмӗш хутӗнче - эндоскопи уйрӑмӗ, хӗрарӑмсен консультацийӗ, терапевтсен кабинечӗсем тата ытти те, виҫҫӗмӗш хута физиотерапипе терапевт уйрӑмĕсем йышӑнӗҫ. Поликлиникӑн ача-пӑча уйрӑмне çитĕннисене йышăнмалли вырăнтан уйрăм тăваççĕ.

Сӑнӳкерчӗкĕ: Пушкӑрт Строительство министерстви.