Паллӑ мар салтак кунне халалласа

Декабрьти сивӗ ир Пишпÿлек районӗнчи патриотсем Паллӑ мар салтак палӑкӗ умне чечексем хума Пишпÿлек ялӗнчи Ҫӗнтерӳ паркне пухӑннӑ. Акцие хутшӑнакансем умĕнче Пишпÿлек район администрацийӗн пуçлăхĕн социаллӑ ыйтусемпе тата кадрсем енӗпе ӗҫлекен ҫумӗ Алексей Данилов, вӑрҫӑ, ӗҫ ветеранӗсен, Хӗҫпӑшаллӑ Вӑйсемпе право сыхлавӗн органӗсен район Совечӗн председателӗ Рафаэль Ибраев тухса тӑчӗ. Мероприятие хутшӑнакансем ҫапӑҫу хирӗнче пуçне хунă салтаксене асӑнса пӗр минут шăп тӑчӗҫ, чĕрĕ чечексем хучӗҫ.
Аса илтеретпӗр, паян пӗтӗм ҫӗршывӗпех ҫакӑн пек акцисем иртеҫҫӗ. Раҫҫейре декабрӗн 3-мӗшӗнче Паллӑ мар салтак кунне — хӑйсен ячӗсене пӗлме май килмен ҫар ҫыннисен паттӑрлӑхне халалланӑ уява паллӑ тӑваҫҫӗ. Хыпарсӑр ҫухалнӑ салтаксем хушшинче ӗлӗк ССР союзӗ пулнӑ ҫӗршывсемшӗн чи пысӑк йыш тивет, ҫавӑнпа та ку кун пирӗншӗн яланах уйрӑм пӗлтерӗшлӗ пулӗ. Раҫҫейре 1966 ҫултанпах вилнӗ воинсен ятне уйрӑммӑн хисеплеме пуҫланӑ. Ун чухне декабрӗн 3-мӗшӗнче Мускав патӗнче нимӗҫ ҫарӗсене аркатса тӑкни 25 ҫул ҫитнине пӗлтерекен паллӑ мар салтак кĕлне Александровски садри Кремль стенисем ҫумне чаплӑн пытарнӑ.
#МыЗаРодину #МыПатриотыРодины

Сăнÿкерчĕкĕсем: Пишпÿлек район администрацин социаллă сетьри страницинчен.