"Яланах хатĕр!" - пионерсен яланхи девизĕ çапла

1922 çулхи çу уйăхĕн 19-мĕшĕнче Пĕтĕм Раççейри комсомолăн 2-мĕш конференцийĕнче пур çĕрте те пионерсен отрячĕсене йĕркелесси çинчен йышăнннă.

1922 çулхи юпа уйăхĕнче Çамрăксен Раççейри коммунистла союзĕн тĕп комитечĕ пĕтĕм Раççейри 5-мĕш съездĕнче «Юные пионеры имени Спартака» ачасен коммунистла организацине тума йышăннă. 1924 çулхи кăрлачăн 21-мĕшĕнче комсомолăн тĕп комитечĕ пионер организацине В.И. Ленин ятне панă.

1926 çулхи пуш уйăхĕнчен – Пĕтĕм союзри В.И. Ленин ячĕллĕ пионер организацийĕ. Малтанхи пионер организацийĕсем комсомол ячейкисемпе пĕрле ĕçленĕ. Субботниксене хутшăннă, çапкаланса çÿрекен ачасемпе кĕрешнĕ, хут пĕлменлĕхе пĕтерме пулăшнă.

1923 çулта шкулсенче пионерсен форпосчĕсемпе базăсем йĕркеленнĕ. Пурĕ 75 пин пионер шутланнă.

1930 çул тĕлне Пĕтĕм союзри пионер организацийĕ çакăн пек йĕркеленнĕ: класс – отряд, шкул – пионер дружини. Пионерсен коллективĕсенче çарпа оборона ĕçĕ пуçланса кайнă. Çамрăк стрелоксен, санитарсен, связистсен кружокĕсем ĕçленĕ, çарпа спорт вăййисем ирттернĕ.

1941-1945 çулсенче тимуровецсен отрячĕсем ĕçленĕ. Вĕсем фронтовиксен çемйисене пулăшнă. Эмел курăкĕсем, тимĕр-тăмăр, танк колоннисем валли укçа-тенкĕ пуçтарнă. Госпитальсенче дежурствăра тăнă, тыр-пул пухса кĕртес ĕçре ĕçленĕ. Нимĕç фашисчĕсемпе кĕрешнĕ çĕрте паттăрлăх кăтартнăшăн Леня Голиков, Марат Казей, Валя Котик, Зина Портнова Совет Союзĕн Геройĕн ятне тивĕçнĕ, пиншер пионера орденсемпе медальсем парса наградăланă.

1962 çулта пионер организацине ачасене коммунистла воспитани панăшăн тата 40 çул тултарнă ятпа Ленин орденĕпе наградăланă.

Пионер символĕ – хĕрлĕ галстук тата значок. Галстук кĕтесĕсем виçĕ ăрăва пĕрлештернĕ: коммунистсем, комсомолецсем, пионерсем. Девизĕ – «Яланах хатĕр пул!»

https://ok.ru/profile/578554898199

Сăнÿкерчĕкĕ: социаллă сетьрен.