Вӗсене пӗрлехи принципсем — ӗҫ, чӑрсӑрлӑх, шанӑҫ тата тивӗҫ пӗрлештереҫҫӗ

 

Районти ҫамрӑк гвардеецсем волонтер юхӑмне, районшӑн пӗлтерӗшлӗ мĕнпур ӗҫсене, спорт, культура мероприятисене хутшӑнаҫҫӗ.

2024 ҫулта регионсенчи ҫамрӑксемпе уҫӑ диалог тӑвас тӗллевпе Пушкӑрт Республикин Пуҫлӑхӗн тӗрлӗ категориллӗ (предпринимательсем, ӗҫлекен ҫамрӑксем, креативлӑ индустрисен представителӗсем, шкул хастарӗсем, студентсен хӑй тытӑмлӑхӗн лидерӗсем, регионтан тухнӑ студентсем тата ыттисем) тӗлпулусен пӗрлехи планне туса хатӗрленӗ. Тематика тӗлпулӑвӗсем 2024-2025 ҫулсенче иртеҫҫӗ.

"Пӗрлӗхлӗ Раҫҫейӗн Çамрӑк Гвардийӗ" — ҫӗршыври ҫамрӑксен чи пысӑк организацийӗ. Пирӗн ҫӗршывӑн пур кӗтесӗнче те "Ҫамрӑк Гвардин" регионти тата вырӑнти уйрӑмӗсем ӗҫлеҫҫӗ. Асӑннӑ организацин тӗллевӗ — ҫамрӑксене демократилле, социаллӑ пурнӑҫпа тӗрӗс общество тӑвас ӗҫе явӑҫтарни, ҫамрӑксене хӑйсен ҫӗршывӗшӗн патриотизм туйӑмӗсемпе мӑнаҫлӑх туйӑмӗсене ӳстерни, сывӑ пурнӑҫ йӗркине, вӗренӳпе ӗҫ йӗркине пропагандӑлани, культурӑна упраса хӑварасси тата аталантарасси, наукӑна, спорта тата туризма аталантарма пулӑшасси тата ытти те. Организаципе унӑн ӗҫӗ ҫинчен юхăм ертӳҫи Галина Леонидовна Данилова каласа парать.

— Пишпÿлек районӗнче вырӑнти "Ҫамрӑк Гварди" отделение 2007 ҫулта тунӑ. Ун чухне ертӳҫи Альфия Давлетбердиевна Уканеева пулнӑ. 2022 ҫулта мана юхăм ертӳҫи турӗҫ. Паянхи кун организацин ретӗнче 370 ҫын. Вӗсем ҫамрӑксемпе ӗҫлекен специалистсем, ҫамрӑк депутатсем, ҫамрӑксен юхӑмӗн вӗренекен тата хастарӗсем. Районти мӗнпур ял поселенийӗсемпе системӑллӑ та йӗркеллӗ ӗҫ йĕркеленĕ, - каласа парать Галина Леонидовна.

Ҫамрӑк гвардеецсем волонтер юхӑмне хутшӑнаҫҫӗ, районшӑн пӗлтерӗшлӗ ӗҫ, спорт, культура ӗҫӗсемпе мероприятисене хутшӑнаҫҫӗ.

Тунӑ ӗҫ тӑрӑх уйӑхсерен рейтингсем пулаҫҫӗ. Пушкӑрт Республикинчи "Пӗрлӗхлӗ Раҫҫейӗн Ҫамрӑк Гвардийӗ" вырӑнти 69 уйрӑмĕ хушшинче Пишпÿлек уйрăмĕ чи лайăх пилӗк уйрăм хушшинче тытӑнса тӑрать. Сӑмахран, 2023 — 2024 ҫул пӗтӗмлетӗвӗсем тӑрӑх Пишпÿлекри вырӑнти уйрӑм республикӑри чи лайӑххисен виçĕ уйрăм шутне кӗрет.

2022 ҫулта Пӗтӗм Раҫҫейри "Ҫамрӑк гварди Пӗрлӗхлӗ Раҫҫей" общество организацийӗн XII-мӗш отчетпа суйлав конференцийӗнче "Единая Россия" Партин Регионти ӗҫ тӑвакан комитечӗн ертӳҫи Руслан Фанависович Насретдинов Галина Данилована Пушкӑрт Республикинчи ҫамрӑксен политикине аталантарас ӗҫе пысӑк тӳпе хывнӑшӑн тата граждан позицине хастар хутшӑннӑшӑн Тав ҫырӑвӗ панӑ.

Вырӑнти уйрӑм ертӳҫи палӑртнӑ тӑрӑх, "Ҫамрӑк Гварди" хастарӗсем хутшӑнакан пӗлтерӗшлӗ мероприятисенчен пӗри — суйлав. Суйлав кунӗнче вӗсем суйлав участокӗсенче сӑнавҫӑсем пулса тӑраҫҫӗ.

— "МГЕР" хӑйӗн членӗсемшӗн лайӑх ӳсӗм парать, карьера картлашки тӑрӑх хӑпарма хӑйне евӗр тӗрек пулса тӑрать. Тӗслӗхрен, Пушкӑрт Республикин Пишпÿлек районĕ муниципаллă район канашӗн улттӑмӗш суйлаври Сухоречкăри 11-мӗш суйлав округӗ тӑрӑх Эльвира Ильдусовна Тикшаева депутат пулса тăнă, Альбина Давутовна Зиганшина - Калинин ял поселенийӗн канашӗн депутачĕ. Ҫамрӑк Гвардин составне хӑйсен заявленийӗсене тӗпе хурса йышӑнаҫҫӗ. Ҫырнă заявление алӑран ҫыраҫҫӗ, ӑна пиртен илме пулать. Эпир пурте тӗрлӗ, анчах пирӗн пӗрлехи принципсем ӗҫ, чӑрсӑрлӑх, шанӑҫ тата тивӗҫ. Эпир ҫӗршывӑн аслӑ историпе йӑли-йӗркине упракансем. Эпир Раҫҫейӗн ҫӗнӗ историне тӑвакансем, - палӑртать Галина Данилова.

— "Ҫамрӑк Гварди" ретӗнче юхăм никӗсленнӗренпе тӑратӑп, - каласа парать Аит ял Советĕнчи çамрӑксемпе ĕçлекен специалист Рашида Латыпова. — Интереслӗ те тӗрлӗ енлӗ ӗҫ. Пӗтӗм мероприятие ҫамрӑксене явӑҫтарма тӑрӑшатпӑр. Вӗренекенсене акцисене хутшӑнма килӗшет. Ҫак самантра вӗсем яваплӑхпа мӑнаçлăха туяҫҫӗ, уйрӑмах "Сигарета канфитпе улӑштаратпӑр", "Пишпÿлек районӗнчи çамрӑксем наркотиксене хирӗҫ" акцисене ирттернӗ чухне. Патриотла, экологи, лекципе ҫутта кӑларакан мероприятисем нумай ирттеретпӗр.

 

Неля САБАХОВА.

Сăнӳкерчӗкӗ: Галина Данилован архивӗнчен.