Евдокимов комбайнер вырмара малта пырать

Калинин ячӗллĕ ООО АПра ӗҫлекен Геннадий Евдокимов комбайнер 2024 ҫулта районта пуринчен ытларах тырă вырнă.
Ку чухнехи Калинин ячĕллĕ агропредприятире ҫиччӗмӗш сезон ӗҫлекен Геннадий Федорович Евдокимов тракторист-машинистӑн производство характеристикине вуласа тухсан савӑнтăм та, мухтава тивĕçлишĕн хĕпĕртерĕм те. Унӑн ячĕпе каланӑ сӑмахсем те, ӗҫ результативлӑ цифрисем те кӑмӑла кайрӗҫ. Пирӗн ялсенче ҫакӑн пек лайӑх кадрсем пур. Ҫакӑ савӑнтарать çеç! Ҫавӑнпа та унпа курнӑҫас, ӗҫ ҫинчен, пурнӑҫ ҫинчен, унӑн ҫемйи ҫинчен калаҫас килчӗ.
— Пирӗн юратнӑ анне Ольга Мануиловна 83 ҫулта, вӑл Çирĕклĕре пурӑнать,— калаҫӑва пуҫлать Геннадий Евдокимов. — Ӑна инсульт тӳссе ирттернӗ хыҫҫӑн пулӑшу кирлӗ. Ҫавӑнпа та ӗҫ хыҫҫӑн Елена мӑшӑрпа куллен ун патӗнче пулатпӑр, килти ӗҫсемпе пулӑшатпӑр. Анне пире - виҫӗ ҫӳллӗ те ҫирӗп ывӑл ҫитӗнтерчӗ. Вӑтам шкултан вӗренсе тухнӑ хыҫҫӑн, тракторист-машинист удостоверени илсен, тӑван колхозра МТЗ-82 тракторпа ӗҫлерӗм, унтан 1997 — 1998 ҫулсенче ҫарта пултӑм, 506 мотострелковӑй полк старшини 2-мӗш миномет батарейинче Грузипе Абхази хушшинчи конфликт вăхăтне лекрӗм. Хулпуҫҫинчен аманнăччĕ, госпитальте сывалтăм, дембель те ҫитрӗ. Ҫапӑҫу ветеранӗн удостоверенине пачĕç.
Пирӗн геройӑн ӗҫ биографийӗ 2004 ҫулта Зирганти МТСри ӗҫрен пуҫланнă. Геннадин ударлӑ ӗҫӗшӗн панă чемпион лентисем пиллӗк. Кунта тракторист та, "Кейс" тата "Нью Холланд" тырӑ вырмалли комбайнсем ҫинче комбайнер та пулнӑ. Геннадий Евдокимов 2018 ҫултанпа вӑй хуракан Калинин ячӗллӗ ООО АП ăна TUCANO-570 комбайн шанса панӑ. Ку хуҫалӑхра тырпул пухса кӗртес ӗҫ пырать-ха: лайӑх çитĕннĕ хӗвелҫаврӑнӑш пуҫтараҫҫӗ. Ҫапла вара Евдокимовӑн кӑтартӑвӗсем паянхи кӑтартусенчен чылай ҫӳллӗрех пулӗҫ. Кун пирки никам та иккӗленмест. Тӗштырӑпа ҫу культурисен пӗтӗмӗшле пухса кĕртни 30 000 центнертан иртет.
— Кӑҫалхи февралӗн 28-мӗшӗнче эпӗ 45 ҫул тултартӑм, - хӑйӗн тӑванӗсемпе ҫывӑх ҫыннисем ҫинчен каласа парать Геннадий Федорович. — 2008 ҫулта эпир Пурлăкари Елена Юрьевнапа мӑшӑрлантӑмӑр. Вӑл икӗ ывӑл парнелерӗ. Аслӑ ывӑл Роман Уфари авиаци колледжӗнче вӗренет, кӗҫӗнни Антон "пиллӗк" паллӑсемпе кӑна Пишпÿлекри 2-мĕш вӑтам шкулта саккӑрмӗш класра вӗренет. Мӑшӑр райцентрти лавккасенчен пĕринче сутуҫӑра ӗҫлет. Хам ҫӳллӗ пулнӑран эпӗ шкул сакки ҫинченех волейболла выляма юрататӑп. Пушӑ вӑхӑтра юлташсемпе пулӑ тытма ҫӳретпӗр. Ӑҫта, хӑҫан мӗн тытмаллине те лайӑх пӗлетпӗр. Пилӗк ҫул каялла икӗ килограмм таякан ҫӑрттан тытрӑм. Ку манӑн пулӑҫăн чи пысӑк трофейӗ.
Малта пыракан тракторист-машинистпа чемпионсен лентисене пӑхса тухнӑ май ирӗксӗрех Хисеплĕ хутсемпе, дипломсемпе тата тав ҫырӑвӗсемпе тултарнӑ пысӑк папка ҫине те тимлетӗн. Чи малтан - район чемпионӗ 2004 ҫултан пуҫласа 2013 ҫулччен тӳрӗ кӑмӑлпа тата ударлӑ ӗҫленӗшӗн. Унтан ПР Ял хуҫалӑх министерствипе Гостехнадзорӗн инспекцийӗн 2015 тата 2021 ҫулсенче ПР АПК тытӑмӗнче нумай ҫул тӳрӗ кӑмӑлпа ӗҫленӗшӗн тата ял хуҫалӑх ӗҫченӗсен тата тирпейлекен промышленноҫ ӗҫченӗсен професси уявӗпе ҫыхӑннӑ Хисеп грамотисем пыраҫҫӗ. Ҫаксем пурте хресченсен йывӑр ӗҫӗн ахаль ӗҫченне хисеплени пулать те.
Владимир СМОЛОВ.
Сӑнӳкерчӗкӗ: Владимир Смолов.