Путин 2020 çултан хĕрлĕ эрех акцизĕсене ÿстересси çинчен закона алă пуснă

РФ Президенчĕ Владимир Путин федераллĕ закона алă пуснă, ун тăрăх 2020 çултан хĕрлĕ эрех акцизĕсене ÿстереççĕ. Документа вырсарникун право информацийĕн официаллă порталĕнче пичетленĕ.Йышăннă законпа килĕшÿллĕн, 2020 çулта хĕрлĕ эрех тата улма-çырла эрехĕн акцизĕ литршăн 31 тенкĕпе танлашать, 2021 çулта — 32 тенкĕ, 2022 çулта — 33 тенкĕ. Шампански акцизĕ 2020 çулта литршăн 40 тенкĕ пулать, 2021 çулта — 41 тенкĕ, 2022 çулта — 43 тенкĕ.

Çакăнпа пĕрлех закон хĕрлĕ эрех тумалли материала, хĕрлĕ эрех, шампански, ликер тума усă куракан винограда акциз таварĕсен шутне кĕртет. 2020 çулта виноград акцизĕ тоннăшан 30 тенкĕ пулать, 2021 çулта — 31 тенкĕ, 2022 çулта — 32 тенкĕ. Хĕрлĕ эрех тумалли материалшăн, виноград тата улма-çырла ăслишĕн (сусло) акциз 2020 çулта литршăн 31 тенкĕпе танлашать, 2021 çулта 32 тенкĕ, 2022 çулта 33 тенкĕ.

Закон 2020 çулхи январĕн 1-мĕшĕнчен вăя кĕрет, анчах ăна официаллă йĕркепе пичетлесе кăларнă кунран уйăх иртсен.

Уçă çăлкуçсенчен илнĕ сăнÿкерчĕк.

Читайте нас: