Ачисемпе мӑнукӗсемшĕн ырӑ тӗслӗх

Лысогоркăри Виталий Семеновичпа Елена Павловна Антоновсем пĕр-пĕриншĕн пурӑнаҫҫӗ

Паян Çирĕклĕ ял совечӗн илемлӗ вырӑнĕсенче вырнаҫнӑ пысӑках мар Лысогоркăра 44 пурӑнмалли ҫуртра 110 ҫын кун кунлать. Кусем ытларах ваттисемпе пенси ҫулӗнчи ҫынсем, вӗсенчен сакӑр ӗҫ ветеранӗ, вĕсене вăрçă ачисем удостоверени панӑ. Ҫакӑн пек удостоверени илнӗ лысогоркăсенчен пӗри пӗлтӗр 78 ҫул тултарнă Виталий Семенович Антонов шутланать.

— Аслӑ ӑру çыннисен шӑпи нумай енӗпе пӗрешкел, — тет юратнӑ мӑшӑрӗпе Елена Павловнӑпа тата кӗҫӗн ывӑлӗн ҫемйипе пурӑнакан Виталий Семенович. — Пирӗн аттесем иккӗшӗ те Тӑван Ҫӗршывӑн Аслӑ вӑрҫин фрончӗсенче ҫапӑҫнӑ, Турра шӗкӗр, аманнӑ пулин те, киле таврӑннӑ. Ҫавӑнпа та аттесемсӗр тӑрса юлнисемпе танлаштарсан, пире ура çине тăма ҫӑмӑлрах пулнӑ. Ӗҫ çулне Ленин ячӗллӗ колхозра тракторист пулса пуçларăм. Ытларах кустӑрмаллă тракторӗсемпе Т-40, МТЗ-50 тата МТЗ-80 ӗҫлерӗм. Хӗллехи тапхӑрта фермӑра выльӑх-чӗрлӗх пӑхакансене пулӑшнӑ.

Виталий Семенович ҫамрӑк чухне кӳршӗ Красногоркӑри илемлӗ, ирӗклӗ тата ӗҫчен хӗрпе Елена Кирилловапа виҫӗ ҫул туслă çÿренине, унӑн чӗрине парӑнтарнине ăшшăн кулса аса илет. Вӗсем 1965 ҫулта мӑшӑрланнă. Елена Антонован пӗтӗм ӗҫ биографийӗ колхозӑн сӗт-товар ферминче иртнӗ теме пулать. Вӑл кашни ҫулах районӑн малта пыракан доярки пулса тӑнӑ. Нумай ҫул тӳрӗ кӑмӑлпа ӗҫленӗшӗн тата сӗт нумай суса илнĕшĕн правительство пысӑк наградине — "Хисеп Палли" орденне тивӗҫнӗ.

— 1976 ҫулта эпир ҫӗнӗ ҫурт лартрӑмӑр, халӗ те унта пурӑнатпӑр, — малалла каларӗ Виталий Семенович Антонов. — Эпир мӑшӑрпа 57 ҫул пӗрле. Икӗ ҫирӗп те ӗҫчен ывăл — Владимир тата Сергей ҫитӗнтернӗ. Лысогоркăра халӗ тӑватӑ мӑнук ҫитӗнет.

Владимир СМОЛОВ.

Сăнÿкерчĕкĕ: Владимир СМОЛОВ.

Тĕплĕнрех «Светлый путь» хаçатра вулăр.