Ачаранах ӗҫе хӑнӑхнӑ

— Ӗмӗр тӑршшӗпех агрономра ӗҫлерӗм. Кунпа пурне те каланӑ ӗнтӗ, — сӑпайлӑн калать Владимир Николаевич. — 60 ҫулта, 1998 ҫулта пенсие тухнӑ пулин те, кайран 22 ҫул тăршшĕ районта яланах ҫӗр тата ӳсентӑран ӗҫӗпе чапа тухнӑ тӑван хуҫалӑхра ҫав специальноҫпа ӗҫленӗ. Иккӗмӗш ҫул ӗнтӗ, ӗҫе çÿреместĕп пулсан та, хӑнӑхнӑ йӑлапа ҫаплах кĕлете пыратӑп. Кунта ҫӗнӗ тырпула йышӑнма хатӗрленес енӗпе интенсивлӑ ӗҫ пырать.

Ҫӗр ҫинчи ҫӑмӑл мар ӗҫне Владимир Абрамов тӗлӗнмелле туртӑмне ҫапла ӑнлантарать: Ситекпуçпе юнашар вырнаçнă тӑван Ольховкӑра ӑна ашшӗ-амӑшӗ Николай Павловичпа Степанида Митрофановна ачаранпах ӗҫе хӑнӑхтарнӑ.

— Район администраци пуҫлӑхӗнче нумай вӑхӑт ӗҫленӗ Наиль Габдуллович Гатауллин яланах ялхуҫалӑх предприятийӗсенче ӗҫсем мӗнле пынипе яланах кӑсӑкланатчĕ, склад пӳлӗмӗсене кӗре-кӗре тухатчĕ, унта яланах вӑрлӑх та, хуҫалӑх нушисем вали те тырă туллиех пулнӑ, -—малалла калать ватӑлма пӗлмен агроном. — Вӑл мана яланах пилӗкҫуллӑх ӗҫлесе ил, унтан тивӗҫлӗ канӑва кайăн тетчĕ. Черетлӗ пилӗкҫуллӑх хыҫҫӑн каллех теп пилĕкçуллăх пулса иртетчĕ. Манӑн ӗҫ тӑван хуҫалӑх коллективӗнче кирлӗ пулнине эпӗ ӑнланаттӑм. Ҫакӑ вара малалла та ӗҫлеме хавхалантаракан лайӑх стимул пулнӑ. Мӑшӑрпа Агрепина Ивановнӑпа нумай вӑхӑт пӗрле пурӑнса ултӑ ача ҫуратнӑ, ҫитӗнтернӗ, вӗрентнӗ. Анчах вунпӗр ҫул каялла, шел пулин те, эпӗ юртнă мăшăрсар тăрса юлтӑм.

Июлӗн 13-мӗшӗнче вӗсем аллӑ ҫул каялла арӑмӗпе туса лартнӑ, паян кӗҫӗн ывӑлӗн Вадимӑн ҫемйипе пурӑнакан Владимир Абрамовӑн ҫутӑ та аслӑ ҫурчӗ патне ҫӑмӑл автомобильсем пӗрре кӑна мар пынӑ. "ПР ял хуҫалӑхӗн тава тивӗҫлӗ ӗҫченӗ" тата "Пишпÿлек районӗн хисеплӗ гражданинӗ" ятлӑ чаплӑ ĕçчене Пишпÿлекри ДРСУ начальникӗ Наиль Гатауллин, район администрацийӗн пуҫлӑхӗн пӗрремӗш заместителӗ Артур Галеев саламласа парне пама килнӗ. Киров ячӗллӗ СПК та ветеранне саламлама манман.

Владимир СМОЛОВ.

Сăнÿкерчĕкĕ: Владимир СМОЛОВ (архивран).