"Вӑрҫӑ кăна ан пултӑр"

Пишпÿлекри Лидия Герасимовна Иванова хӑйӗн паттӑрла ӗҫӗпе тылра Ҫӗнтерӗве ҫывхартнӑ.
Аслӑ Отечественнӑй вӑрҫӑ пуҫланнă вăхăтра Лидия Герасимовна 11 ҫулта пулнă. Вӑрҫӑ пуҫланни ҫинчен хыпар пӗр самантрах ӗнерхи ачасене çитĕнме хистесе янă — хӗрарӑмсемпе тата ватăсемпе пӗрле вӗсем "17-мӗш парти съезчӗ" ячĕллĕ колхозра хресченсен ҫӑмӑл мар ӗҫне мӗн вӑй ҫитнӗ таран пурнӑҫланă: вырнă, ҫулнă, кӗлте ҫыхнă, тырра авӑн ҫапнă.
- Выҫă пулни ялан асра. Вӗлтӗрен, мăян ҫинӗ,
- аса илет вӑрҫӑ ҫулӗсене Лидия Иванова. — Талӑкӗпех ӗҫлеттĕмĕр. Пурне те алӑпа тунӑ, механизациленӗ ӗҫ мӗн иккенне пӗлмен.
Йывӑр вӑхӑт вӗсен хулпуҫҫийӗсем ҫине тивнӗ. Унтанпа хӗрачасемпе арҫын ачасем пурнӑҫӑн хаяр шкулне вӗренсе тухнӑ. Ӗҫ укҫишӗн мар, ӗҫ кунӗсемшӗн ӗҫленӗ.
Ӗҫчен, сӑпайлӑ, кирек мӗнле ӗҫе те яваплӑ пурнăçлакан Лидия Иванова тивӗҫлӗ пурнӑҫ пурӑнса ирттернӗ. Тыл ӗҫченне, ӗҫ ветеранне "Тӑван Ҫӗршывӑн 1941-1945 ҫулхи Аслӑ вӑрҫинче паттӑр ӗҫленӗшӗн" медальпе, хисеплӗ хутсемпе, тав ҫырӑвӗсемпе, Ҫӗнтерĕвĕн юбилей медалӗсемпе наградӑланӑ. "Тыл геройӗсем" кӗнекере, фашистла Германие çĕнтерме хӑйсен паттӑрла ӗҫӗпе тивӗҫтерекенсен ячӗсене ҫырнисен хушшинче Лидия Герасимовна Иванован ячӗ те пур унта (т. 4, стр. 667).
Июнӗн 19-мӗшӗнче Лидия Герасимовна 93 ҫул тултарать. Пурӑнать вӑл ывӑлӗн ҫемйипе. Ветеран чир-чĕре парӑнасшӑн мар.
— Пуринчен ытла пĕр кăмăл, вӑрҫӑ кăна ан пултӑр, - вӗҫлет Лидия Иванова.
Ирина ФОМИНА.
Сӑнӳкерчӗкӗ: Ирина ФОМИНА.