Декабрӗн 3-мӗшӗнче пӗтӗм тӗнчипе сывлӑх начар çынсен кунне паллӑ тӑваҫҫӗ

Декабрӗн 3-мӗшӗнче пӗтӗм тӗнчипе сывлӑх кăлтăкĕсемлĕ çынсен кунне паллӑ тӑваҫҫӗ. Пишпÿлекри "Парус" спорт шкулĕнче уйрӑм ачасем валли спортпа йӑпану мероприятийӗсем иртнĕ. Йӑпанмалли-вылямалли программа Пишпÿлекри çамрăксен "Вектор" центрĕн, Ача-пӑча пултарулӑх центрӗн, "Движение первых" тата "Парус" спорт шкулĕн коллективӗн вăйĕпе хатĕрленĕ. Ачасене администраци пуҫлӑхӗн социаллӑ ыйтусемпе кадрсем енӗпе ӗҫлекен заместителӗ Алексей Данилов тата Пишпÿлек районӗнчи инвалидсен обществин председателӗ Зульфия Пулатова саламланă. Интерактивлӑ вӑйӑсемпе, ташӑсемпе уяв малалла тӑсӑлнă. Район администрацийӗн ҫамрӑксен политикипе спорт секторӗн специалисчӗсем ачасем валли спорт эстафети хатӗрленӗ. Ачасем виҫӗ командӑна пайланса хӑвӑртлăхпа та ҫаврӑнӑҫулӑхпа ӑмӑртнă. Эстафетӑсем "Орел" командӑн ҫӗнтерӗвӗпе вӗҫленнӗ. Ачасем пурте тĕп библиотекӑран "Сире ырлăх тата савӑнӑҫ парнелетпĕр" акци шайӗнче медальсем, асӑнмалӑх призсем тата канцеляри хатӗрӗсем илнĕ.
Уяв асăнмалăх сӑнӳкерчӗкпе вӗҫленнӗ.
Ачасене кӗтекен ашшӗ-амӑшӗсем валли районти социаллӑ службӑсен представителӗсемпе "Ҫавра сӗтел" йӗркеленӗ, унта ашшӗ-амӑшӗсем хӑйсене интереслентерекен ыйтусем ҫине хуравсем илме пултарнӑ.

Сăнÿкерчĕкĕсем: Пишпÿлек район администрацин социаллă сетьри страницинчен.
https://vk.com/officialbiz