"Эпӗ ывӑла ырă-сывă таврӑнма сӑмах патӑм"

Отпуска килнӗ боец хӑй ирӗкӗпе РФ Оборона министерствипе контракт ҫине алӑ пусма мĕнле сăлтавпа шутлани ҫинчен каласа панă.
Пирӗн герой нумаях пулмасть 49 ҫул тултарнă. Вӑл "Темир" позывнойпа çÿрет, çакă "тимӗр" тенине пӗлтерет. Шӑпах ҫак сӑмах ҫар ҫыннин характерне кӑтартса парать. Вӑл Чулпан ялӗнче ҫуралса ӳснӗ. Ҫулталӑк тултарсан ашшӗ-амӑшӗ Казахстана куҫса кайнӑ. Унта вӑл ӳснӗ, "Электромонтер" специальноҫпа училищӗрен вӗренсе тухнӑ. "Темирӑн" ҫурӑмӗ хыҫӗнче Сывлӑшпа десант ҫарӗсенче сроклă служба. Халӗ мӑшӑрӗпе пӗрле Пишпÿлекре пурӑнаҫҫӗ, пилӗк ҫулхи ывӑлне ÿстереççĕ. Малтанхи мӑшӑрлануран унӑн Уфара пурӑнакан ҫитӗннӗ ывӑлӗ те пур. Боец каларӗшле, вӑл — унӑн пысӑк мӑнаçлӑхӗ.
Мобилизаци пуҫланнӑ хыҫҫӑн пирӗн ентеш военкомат алӑкӗсем тăрăх хастар ҫӳренӗ, ӑна фронта илсе кайма ыйтнӑ.
— Уйрӑм мобилизаци пуҫлансан, призыв манӑн нумай туссемпе пӗлӗшсене пырса сӗртӗнчӗ. Мана повестка ҫаплах килмерӗ. Манӑн хӑш-пӗр тусӑмсем унта пуçне те хучĕç. Мана ҫавăн пек вӗрентсе ӳстернĕ, эпӗ айккинче юлма пултараймарӑм. Унта эпӗ кирлине хам та туйрӑм. Ҫавӑнпа та чӗнессе текех кӗтме пултараймарăм, ҫар комиссариатне кайрăм. Пӗлтӗр июнь уйӑхӗнче РФ Оборона министерствипе контракт çине алӑ пусрăм. "Башкортостан" полк составне кӗтӗм, - каласа парать СВОна хутшӑнакан.
Боец подразделение тӗрлӗ ҫулсенчи арҫынсем пухӑннӑ пысӑк ҫар ҫемйи ҫинчен, тӗрлӗ опытлӑ, тӗрлӗ характерлӑ арҫынсем ҫинчен каласа парать. Анчах вӗсене пурне те пӗр пысӑк тӗллев — ҫӗнтерӳ пуласса шанни пӗрлештерет. Вӗсем пурте унта пӗр-пӗриншĕн тӑраҫҫӗ.
— Унта хăвна сыхлас инстинкт лайӑх ӗҫлет. Манӑн ҫар опычӗ ҫамрӑксеннинчен кӑшт нумайрах темелле. Эпир вӗсене вӗрентетпӗр, пулӑшатпӑр. Унта çар тӑванлӑхĕн сывлӑшӗ пур. Блиндажсенче пурӑнатпӑр. Вӗсене хамӑр тӑватпӑр, майлаштаратпӑр, ӑшӑтатпӑр. Унта газ плиткисем лараҫҫӗ, хамӑр апат хатӗрлетпӗр. Апат-ҫимӗҫ ҫителӗклӗ. Гуманитари пулӑшӑвӗ те килет. Пӗррехинче Пишпÿлекрен шӑпах посылка килчӗ. Ку маншӑн кӗтмен ҫӗртен тата питӗ кӑмӑллӑ пулчӗ. Унта питӗ кирлӗ маскировка сеткисем ярса панăччĕ, - каласа парать боец.
"Темир" гуманитари пулӑшӑвне пухнӑ волонтерсене чĕререн тав тăвать.
- Вӗренекенсенчен ҫырусем - хӑйне уйрӑм пулӑшу. Ӑшӑ сӑмахсем малалла кайма вӑй параҫҫӗ, чи кӑткӑс самантсенче пулӑшаҫҫӗ, — палӑртать СВОна хутшӑнакан.
"Темир" — штурмовик, яланах малти линире тӑрать. Отпуск умӗн вӑл аманнӑ. Унӑн урине пуля лекнĕ, вунӑ кун çав пульăпа ҫӳреме тивнӗ.
Тӑванӗсемпе тусӗсем боеца пулӑшаҫҫӗ. Ҫемье нумай вӑхӑт хушши уйрӑлмасӑр пурӑннӑ хыҫҫӑн упӑшкине, ашшӗне, ывӑлне курма телейлӗ. Хамӑр ентеш хӑвӑртрах сываласса шанатпӑр. Унпа пӗрле ҫӗнтерӗве шанатпӑр, хӑвӑртрах таврӑнма сунатпӑр.
— Ҫемье ҫинчен шухӑшлани вӑй парать. Эпӗ ывӑлӑма ырă-сывă таврӑнма сӑмах патӑм. Хам сӑмах панине эпӗ яланах тытма тăрашатăп. Чи кирли - эпӗ чӗрӗ те сывах. Ҫӗнтерӳ пирӗнте пулатех, - палӑртать воин.
Неля САБАХОВА.
Сӑнӳкерчӗкĕ: боецӑн архивӗнчен.