Анастасия Тихонова кашни пушӑ минутра маскировка сетки карнă станок патне васкать

Настя — Пишпÿлекри 3-мĕш вăтам шкулти ҫамрӑк ӑру представителӗ, шанчӑклӑ та яваплӑ ҫын. Ятарлӑ ҫар операцийӗ пуҫланнӑ малтанхи кунсенчех гуманитари пулӑшӑвне ӑсатас ӗҫе хутшӑнаканскер. Маскировка сеткисем ҫыхмалли пункта уҫнӑранпа сеткăсем явма хастар хутшӑнать.

Ҫак ырӑ сӑмахсем Анастасия Евгеньевна Тихонова çинчен. Вӑл Пчельник паççулккинчи туслӑ ҫемьере ҫуралса ӳснӗ. Ачасене ашшӗ-амӑшӗ ӗҫчен тата туслӑ пулма воспитани панӑ. Йăлпăлакри тӗп шкултан вӗренсе тухнӑ хыҫҫӑн Настя Уфари полиграфи лицейӗнче малалла вӗреннӗ. Пелепей хулин типографийӗнче практика ӑнӑҫлӑ иртнӗ. Ҫамрӑк специалиста типографинче мухтанă. Ситекпуç ялӗнче хӑйӗн шӑпине тӗл пулнă. Геннадий упӑшкипе пӗрле ывӑлпа хӗр ҫитӗнтереҫҫӗ. Сӑмах май каласан, Настя питӗ туслӑ, ӗҫчен тата питӗ хисеплӗ Тихоновсен ҫемйине качча тухнӑ.

Ҫамрӑк ҫемье лайӑх пысӑк ҫурт лартнӑ. Палисадникре ҫулла чечексем тутлӑ шӑршӑ сараҫҫӗ. Анастасия ӑста кил хуҫи. Килти тӗрлӗ йышши хатӗрсем, тутлӑ кукӑльсем — ҫаксем пурте унӑн пӗлсе пулса пыраҫҫӗ. Канмалли кунсенче ҫемье ашшӗ-амӑшӗ патне васкать. Ҫамрӑксем ашшӗ-амӑшӗшӗн шанчӑк тата тӗрек пулса тăраççĕ.

Ятарлă çар операцийĕ ҫынсене пурне те пӗрлештерчӗ. Пирӗн пулӑшу боецсене питӗ кирлӗ те питӗ хаклӑ. Ҫемье боецсем валли укҫа-тенкӗ пухнӑ чухне те пулӑшу парать.

Анастасийăпа ӗҫлеме ҫӑмӑл та шанчăклă. Вӑл ĕçе пуҫлакансене пулӑшать, вĕрентет. Кашни пушӑ минутра сеткă карнă станок патне васкать.

Эпир Анастасия Евгеньевнапа Геннадий Александровича тăнăçлăх, ырлӑх-сывлӑх сунатпӑр. Мӗн шухӑшлани пурнӑҫлантӑр. СВОна пулӑшу пани, ырă туни пӗтӗмпех хăвăра таврăнтӑр. Ан тив, пирӗн кĕл туса, ӑстаҫӑсен тӑрӑшуллӑ аллисем явнă сеткăсем пирӗн боецсене хӳтӗлеччӗр. Пурне те ҫӗнтерӳпе киле таврӑнасса кӗтетпӗр.

#СвоихНеБросаем
#ВсеДляФронтаБижбуляк

Людмила ЛАПШИНА,

Пишпÿлекри 3-мĕш вăтам шкул.

Сăнÿкерчĕкĕ: Анастасия Тихонован архивĕнчен.