Упа ресторана хăнана килнĕ

Пушкăртри Абзелил районӗнче упа ҫури йӗлтӗр комплексӗн ресторанне килсе çитнĕ. Заведени сотрудникӗсем шала кӗрес тесе картлашкасем ҫинче чалӑш ураллӑ упа тапӑртатнине ÿкерсе илнĕ.

Ҫырусен авторӗ упа ҫури выҫӑ тата вӑрмантан апат шырама тухнӑ тесе шутланӑ. Ҫав хушӑрах мишка хӑйне йӗркеллӗ тыткаланă, лару-тӑрӑва хакласа, чӳрече умӗнчи картлашка ҫине хӑпарса ларнă та пӳлӗм ӑшнелле пӑхма тытӑннă.

Канакансем васкавлӑ службӑна пулӑшу ыйтни ҫинчен пӗлтернӗ. Вырӑна килнӗ ҫӑлавҫӑсем тискер кайӑка вӑрмана хӑваласа яма пултарнӑ.

Унччен "Башинформ" агентство тискер чӗрчунсен хастарлӑхӗ ҫинчен пӗлтернӗччĕ. Ҫыннӑн упапа тӗл пулма тивнӗ пулсан, специалистсем ҫакӑн пек канашсем параҫҫӗ:

— упа патне нихӑҫан та ан ҫывхарӑр, вӑл хӑйне "тусла" тытать пулсан та;

— упана тем пулсан та ан хӑратӑр, мӗншӗн тесен вӑл хуравласа тапăнма пултарать;

— хӑвӑр виҫене пысӑклатӑр, аллӑрсене ҫӳлелле ҫӗклӗр, туссемпе пӗрлешӗр — хӑвӑр ытларах пулнине кӑтартӑр. Упасен тӗнчинче тӑшманӑн виҫи уйрӑмах пысӑк пӗлтерӗшлӗ;

— упаран нихӑҫан та ан тарӑр. Вӑл йӗрлеме юратать, ҫынна хӑвалама пултарать. Чĕрчун патӗнчен ерипен, питпе ун еннелле ҫаврӑнӑр та каялла хуллен чакăр. Яланах асра тытӑр: хӑрушсӑр упа вӑл — аякри упа.

 «Башинформ» информацийĕпе.

Сăнÿкерчĕкĕ: видеоран стоп-кадр.