Пушкăртстанра сахал тупăшлă çемьесене пулăшу укçи-тенки параççĕ

Федераллĕ ведомствăра пĕлтернĕ тăрăх, пулăшăва проекта хутшăнакан 21 регион илет. Çакнашкал регионсем чи нушаланакансен шутне кĕреççĕ.

Финанс пулăшăвĕ илме май паракан социаллă контракта регионсенчи халăха социаллă хÿтлĕх паракан органсем сахал тупăшлă çемьесемпе 3 уйăхран пуçласа çулталăк срока тăваççĕ. Кирлĕ пулсан, срокне тăсаççĕ.

Контрактри чи кирлĕ услови — уйăрнă укçа-тенкĕпе пурнăс условисене лайăхлатма усă курмалла, вак-тĕвек расхутсем валли мар, мĕншĕн тесен проект граждансене кризисран тухма пулăшма тĕлленĕ. Çавăнпа та социаллă хÿтлĕх органĕсем план тăваççĕ, унта ĕçе вырнаçассине, профессие вĕренессине, çемьене медицина пулăшăвĕ парассине, вак-тĕвек бизнеса ура çине тăма пулăшассине тата ыттине пăхса хăварнă.

РФ Ĕç министерствинче палăртнă тăрăх, çакнашкал мерăсене нушаланакан çемьесене пулăшас тесе «Демографи» нацпроект йĕркипе йышăнаççĕ. 2024 çул тĕлне соцконтрактсем пулăшнипе МРОТран сахалрах тупăшлă граждансем хăйсен пурлăх лару-тăрăвне лайăхлатма пултарасса шутлаççĕ.

РФ Ĕç министерствин пресс-служби.