Токиора Паралимпиада уҫнӑ ҫӗрте пушкӑрт спортсменки ялав çĕклекен пулать

Августӑн 24-мӗшӗнче Токиора Паралимпиада-2020 уҫнӑ церемони иртет.

Ӑна Уфа вӑхӑчĕпе 16 сехете ирттерме палӑртнӑ. Тӳрĕ трансляцие «Матч ТВ» телеканалпа курма пулать. Раҫҫей пӗрлештернĕ командин ялавҫисем ҫӑмӑл атлетика енӗпе ултă хут тĕнче чемпионӗ Андрей Вдовин тата 1500 метр чупакан ӑмӑртура икӗ хут паралимп чемпионки, пушкӑрт спортсменки Елена Паутова пулӗҫ.

Аса илтеретпӗр, санкцисене пула Раҫҫей спортсменĕсем RPC (Russian Paralympic Committee) аббревиатурӑпа тата Раҫҫей Паралимп комитечӗн гербне ҫакнӑ шурӑ ялав айӗнче ăмăртĕç. Раҫҫей ҫӗнтерӗвӗсене чысласа РФ гимнне мар, Петр Чайковский №1 концерт вступленийĕ янӑрӗ.

Раҫҫей сборнӑйне Паралимпиада-2020 ҫӗршыври 50 регионтан 241 спортсмен кӗнӗ. Пушкăрт чысне сĕтелçи теннисра, ишессипе, фехтованире, ҫӑмӑл атлетикӑра 14 спортсмен хÿтĕлет.

«Башинформ» информацийĕпе.