Олег Агеев: «Хисеплĕ ят илме пысăк çул иртрĕм»

Ситекпуçĕнчи тӗп шкул педагогӗн Олег Александрович Агеевăн тухӑҫлӑ ӗҫне "Пушкӑртстан Республикин тава тивӗҫлӗ учителӗ" хисеплӗ ятпа хакланӑ.

Ҫӗнӗ 2021-2022 вӗренӳ ҫулӗн пуҫламӑшӗ умӗн Уфари "Торатау" Конгрес-холта пӗтӗмӗшле пӗлӳ паракан тӗп шкулти физкультура учителӗ Олег Агеев "Пушкӑртстан Республикин тава тивӗҫлӗ учителӗ" сумлӑ ята тивӗҫнӗ. Пысӑк наградăна вӑл Пушкӑртстан Пуçлăхĕн Радий Хабировăн аллинчен илнӗ.

—Кӑҫал физкультура учителӗн педагогика стажӗ хӗрӗх ҫул пулать, — тет сӑпайлӑ та нумай калаҫма юратман Олег Агеев. — Тӑван шкулта, хам та çавăнта вӗреннӗ, 1984 ҫултанпа ӗҫлетӗп. Стерлитамакри физкультура техникумӗнче тата Челябинскри физкультура институтӗнче вӗреннӗ чухне ишессипе, акробатикӑпа тата грекпа-рим кӗрешӗвӗпе кӑсӑкланаттăм тата хулари ӑмӑртусенче яланах малти вырӑнсем йышӑнаттăм.

Чӗрӗк ӗмӗр хушши Олег Агеев районти сабантуйсенче кӗрешекенсен ҫулленхи судйи пулнă. Тен, ҫакӑ Олег Александровича чӑваш ялӗнче пушкӑртсен наци кӗрешӗвне ачасене явӑҫтарма хӑтланса пӑхма хистенӗ. Ситекпуç ҫамрӑк кӗрешӳҫисем районти ытти шкулсенчен пуринчен те малта пулнă ӗнтӗ, республикара та. Вӗсем опытлӑ педагог тата авторитетлӑ тренер ертсе пынипе, акробатика тата вӑй-хал упражненийӗсемпе пикеннĕ тата пушкӑртсен наци кӗрешӗвӗнче чи ҫӳллӗ шая ҫитнӗ. Хӑйсен виҫе категорийӗсенче вӗсемпе танлашаканни пулман !

— Ун чухне шкулсен ĕç-хĕлне контрольлекен район администраци пуҫлӑхӗн заместителӗ Валиулла Аюпович Булатов пӗррехинче пире: "ҫакнашкал спортсменсемпе Мускава тата Европӑри ӑмӑртусене хӑюллӑнах кайма пулать", — тесе мухтарӗ. Пирӗн пата альшейсем, ермекейсем тата миякисем вӗренме килчӗҫ. Ситекпуç кӗрешӳҫисем республика тата регионсен шайӗнче тӗрлӗ пробӑллă 250 медаль ҫӗнсе илнӗ. Вӗсем Пушкӑртстан Чемпионӗсем тата команда зачетӗнче темиҫе хут та малтисем пулчӗҫ.

—"Пушкӑртстанӑн тава тивӗҫлӗ учителӗ" пысӑк награда патне ҫине тӑрса ӗҫпе чылайччен пытăм, — тет Олег Александрович. — Кӗрешӳ яланах хӑрушлăх тăратакан спорт тӗсӗ шутланнă. Эпӗ хам та, кӗрешӳ вӑхӑтӗнче, район сабантуйĕнче алла хуҫнăччĕ. Хамăн воспитанниксене те медальсемпе çитĕнÿсем çине тăнипе тивĕçнĕ. Вӗсем манăн шанăçа ялан тÿрре кăларчĕç.

Владимир СМОЛОВ.

Сăнÿкерчĕкĕ: Олег Агеевăн архивĕнчен.

Тĕплĕнрех «Светлый путь» хаçатра вулăр.