Байрас Батраев: "Куреш дисциплинăна çирĕплетет"

Биккулти 12 çулхи Байрас Батраев наци кӗрешӗвӗн чемпионӗсен ӑрӑвне малалла тӑсать.

Байрас Биккул ялĕнчен. Сакӑр ҫултанпах кӗрешме пуҫланă. Батраевсен йӑхӗнчи арҫынсем пурте кӗрешнӗ тата район чемпионӗсем пулса тӑнӑ, Оренбург облаҫӗнчи Телякаевсем — ирĕклĕ кӗрешӳпе ПР чемпионӗсем.

— Эпӗ тренера Ильгам Ришатовича пула лайӑх кӑтартусем тума пултаратӑп. Вӑл яланах пирӗн ума тӗрӗс тӗллевсем лартать, пирӗнтен кашнинпе тӑрӑшса ӗҫлет. Тренировкӑсене хаваспах ҫӳретӗп, нихӑҫан та сиктерместӗп. Тренировкӑсенче 100% пӗтӗм вăя кăларса паратӑп. Кун йӗркине тытса пыратӑп, апат-ҫимӗҫе тӗрӗслесе тӑратӑп. Спорт тӗп вӗренӗве кансӗрлемест, пачах урăхла, ҫавна пула манӑн дисциплина ҫирĕпленчӗ.

Байрас 2020 ҫулта Пелепейри Т.Х. Бахтиярова асӑнса ирттернĕ турнирта виҫҫӗмӗш вырӑн йышӑннӑ. Пӗлтӗр Аургазă районӗнче — пӗрремӗш вырӑн. Ҫулсеренех Пишпӳлек сабантуйне хутшӑнать, кӑҫал виҫҫӗмӗш вырӑн йышӑннă, шкулти ӑмӑртусенче пӗрре мар ҫӗнтернĕ. Шкулта тренировка тунисӗр пуҫне ашшĕпе тата пиччĕшĕпе килте тренировка тăвать.

— Ку вӑл манӑн спорт историйӗн пуҫламӑшӗ кӑна, малашне мана ҫӗнӗ ҫӗнтерӳсем кӗтеҫҫӗ, тесе шанатăп, — каласа парать Байрас.

Ҫуллахи каникул хыҫҫӑн Каныкайри вӑтам шкул спортсменӗсен каллех юратнӑ тренировкисем пуҫланнă.

Карина ПАВЛОВА.

Сăнÿкерчĕкĕ: Байрас Батраевăн çемье архивĕнчен.

Тĕплĕнрех «Светлый путь» хаçатра вулăр.