Вируса сарăлма парар мар

Китайран тухнă коронавирус пур çĕршыва та алла илчĕ тесен те йăнăш мар. Çак вирусран хỹтĕленес, ăна сарăлма парас мар тесе Раççейре тивĕçлĕ йышăнусем тăваççĕ.

Специалистсем коронавирус ытларах 65 çултан иртнисене ернине палăртаççĕ. Италире вилекенсен йышĕ нумаййине те шăпах çакăнпа çыхăнтармалла, унта 80-ран иртнисем чылай пулнăран ăна «чи ватă çĕршыв» теççĕ. Китай ку вируса парăнтарнă тесен те йăнăш мар: унта çирĕп карантин йышăнни витĕм кỹнĕ. Коронавирус паян Европăра вăй илнĕ. Пĕтĕм Раççейри сывлăх сыхлавĕн организацийĕ пĕлтернĕ тăрăх, мартăн 25-мĕшĕ тĕлне тĕнчере 375498 çын коронавируспа чирленĕ, вĕсенчен 16362-шĕн пурнăçĕ татăлнă.

Тухтăрсем вирус сарăлнă вăхăтра ытларах килте пулмаллине, çын пухăнакан вырăнта пулма юраманнине асăрхаттарсах тăраççĕ.

Хамăр сывлăхшăн хамăр яваплине манар мар.

Инфекци чирĕнчен асăрханмалли меслетсем ансат:

- алла тăтăш супăньпе çумалла, уйрăмах çынсем йышлă пулнă вырăнтан, урамран таврăннă хыççăн тата апатланас умĕн;

- алăпа пит-куçа тытмалла мар

- медицина маскипе усă курмалла

- массăллă мероприятисене хутшăнассинчен тăхтаса тăмалла

- пасарсене каймалла мар

- пĕçерсе, вĕретсе, ăшаласа хатĕрленĕ апат çеç çимелле, кĕленчери шыва ĕçмелле.

Читайте нас: