Пушкӑртстан врачĕсен 90 проценчӗ коронавирусран вакцинациленнӗ

Пушкăртстанра пурӑнакан миллиона яхăн ҫынна хӑрушӑ коронавирусран прививка турӗҫ. Регион медработникӗсем инфекципе кӗрешмелли чи малти ретре тӑраҫҫӗ, вĕсем хăйсене тата ыттисене хӑрушсӑрлатма кирлине ӑнланаҫҫӗ, ҫавӑнпа вӗсенчен 90 процента яхӑн вакцинаци иртнӗ ӗнтӗ. Кун пирки регион правительствин премьер-министрӗн ҫумӗ — сывлӑх сыхлавӗн министрӗ Максим Забелин пӗлтерчӗ.

Пушкăрт вице-премьерĕ каланӑ тӑрӑх, 2020 ҫулта пӗрремӗш парти вакцина илнӗренпе медицина ĕçченĕсене вакцинацилесси приоритетлӑ пулнӑ.

Врачсем хӑйсем прививка пирки мӗн шутлаҫҫӗ?

Республикӑн кардиологи центрӗн 2-мĕш рентген-хирурги меслечӗсен уйрӑмӗн заведующийĕ Тимур Хафизов «Башинформ» агентствӑна пӗлтӗрхи август уйӑхӗнче COVID-19 чирлесе ӳкни ҫинчен каласа пачӗ, анчах кӑҫал ҫулла прививка тунă, мӗншӗн тесен вӑхӑт иртнӗҫемӗн антителасен шайӗ чакса пырать, сывлӑх, хӑйӗн тата па-циентсен ҫинчен манма юрамасть.

— Паллах, кирек мӗнле эмел препарачӗсен пекех, вакцинăн хушма эффекчӗсем пур. Анчах та вӗсен теветкеллӗхӗ коронавирус инфекцийӗпе чирлессинчен лайӑхрах. Чирлесе ÿксен чире менле чăтса ирттерессине никам та пĕлмест вĕт, — палӑртрӗ тухтӑр.

Нефтекамск хулинчи медицина профилактикин уйрăмĕн ертӳҫи Наталия Валиева ревакцинаци иртнӗ — унӑн шучĕпе, пахалӑхлӑ пурнăç ҫакӑнтан килет.

Уфари 3-мĕш Ача-пӑча стоматологи поликлиникин хирурги уйрӑмӗн заведующийӗ Наталья Абдуллина пациентсене, тӑванӗсене тата ҫывӑх ҫыннисене хӑрушсӑрлатас тесе прививка турӗ.

— Пурне те гражданла яваплӑх кӑтартма тата прививка тума чӗнетӗп! Хӑвӑра, пӗр-пӗрне сыхлӑр! — тет вăл Пушкӑртстан çыннисене.

МИХ информацийĕпе.

Сăнÿкерчĕкĕ: «Башинформ».