Владимир Путин çулталăк пуçланнăранпа 32 теракта сирсе яни пирки каланă

Раҫҫей хӑрушсӑрлӑх органӗсен террористла хӑратӑва тӗпрен чакарма тата кӑҫалхи 11 уйӑхра 32 теракта сирсе яма май килнӗ.

Кун пирки тунтикун, декабрӗн 20-мӗшӗнче, РФ Президенчӗ Владимир Путин "Звезда" телеканал сайтӗнче пичетлесе кӑларнӑ Хӑрушсӑрлӑх органӗсен ĕҫченӗн кунӗ ячӗпе видеообращенинче палӑртнӑ.

Вӑл каланӑ тӑрӑх, юлашки ҫулсенче терроризмпа кӗрешнӗ чухне пысӑк ҫитӗнӳсем, пӗтӗмӗшле илсен, позитивлӑ динамика палӑраҫҫӗ. Патшалӑх пуҫлӑхӗ иртнӗ 11 ҫул хушшинче 200 ытла теракта чарса лартнине, террористла преступленисен шучӗ вара ҫак тапхӑрта темиҫе хут та чакнине асӑрханӑ тата "ҫавнашкал преступленисенчен ытларахӑшне хатӗрленĕ тапхăрта чарнине" палӑртнӑ.

"Сӑмахран, иртсе каякан çулăн 11 уйӑх хушшинче эсир килӗшӳллӗ тата оперативлӑ пулнине пула 61 усал ӗҫе, ҫав шутра 32 теракта, чарса лартнӑ. Ку лайӑх кӑтарту, анчах проблемӑсем нумай-ха", — тенӗ Президент хӑрушсӑрлӑх органӗсен ӗҫченӗсене.  

 «Известия» информацийĕпе.

Сăнÿкерчĕкĕ: ИЗВЕСТИЯ/Павел Волков.