Пурте пĕрле пĕр ача садĕнче

Коронавирус инфекцине сарăлма парас мар тесе Пушкăртстанра мартăн 30-мĕшĕнчен пуçласа самоизоляци режимне кĕртнĕ.

Çапах çак тапхăрта ĕçлекен организацисемпе предприятисем районта пурах, вĕсем пурнăçшăн кирлĕ ĕçсем пурнăçлаççĕ. Паллах, çынсен пурнăç йĕрки питĕ улшăнчĕ, анчах ачасене ниçта тата никампа хăварма май çуккисем ача садне илсе каяççĕ — вĕсем валли Гульназ Яхина ертсе пыракан «Улыбка» ача садĕнче дежурнăй ушкăн ĕçлет. Хальлĕхе унта Пишпÿлекри «Улыбка», «Умка» тата «Журавушка» воспитанникĕсем çÿреççĕ, ушкăнра 15 ачаран ытла пулмалла мар (7-рен пуçласа 12 ача таран куллен ача садне килет). Унашкал ачасен ашшĕ-амăшĕ ĕçлекен вырăнтан справка илсе килмелле.

Ачасемпе Ильмира Лутфиева, Наталья Михайлова, Ирина Чернова воспитательсем, воспитателе пулăшакан Инна Иванова ĕçлеççĕ. Вĕрентÿ процесне ачасен ÿсĕмне шута илсе комплекспа тематика планированипе килешÿллĕн йĕркеленĕ.

Ача садĕнче коронавируса хирĕç мĕнпурмпрофилактика мерисем йышăннă. Медицина сестри Наиля Альмухаметова сывлăх мониторингне куллен ирттерет. Пÿлĕмсене дезинфекци хатĕрĕсемпе тасатсах тăраççĕ. Ачасем валли Ирина Михайлова, Марина Доркина, Алевтина Макарова поварсем графикпа апат хатĕрлеççĕ, кунне тăватă хутчен апатлантараççĕ, пурне те СанПиН требованийĕсемпе килĕшÿллĕн тăваççĕ. Кашни кун апат-çимĕçе хуçалăх заведующийĕ Татьяна Шарипова тата Геннадий Валиуллин водитель илсе килсе тăраççĕ.

Хальхи вăхăтра самоизоляци режимĕнчи ачасен хисеплĕ ашшĕ-амăшĕ! Ачăрсем çак вăхăтра килте пулнине тимлĕ пăхса тăрăр! Сывлăхăра упрăр!

Айгуль ГАРЕЕВА.

Сăнÿкерчĕкĕ: Айгуль ГАРЕЕВА.