Сухоречкăри Надежда Игнатьева çÿллĕ ята тивĕçнĕ

Октябрӗн 5-мӗшӗнче Уфара Учитель кунĕнче республикӑри педагогсене чысларӗҫ. Вӗсем патне Пушкăртстан Пуҫлӑхӗ Радий Хабиров саламлама пынă, тав туса сӑмах каланă. Чаплӑ церемонире вӑл патшалӑх наградисем тата ялта ӗҫлекен ҫамрӑк учительсене сертификатӗсем панӑ. Хӑйсен професси уявĕнче 10 педагог "Пушкӑртстанӑн тава тивӗҫлӗ учителӗ" ята илнӗ. Хисеплӗ ятпа паллӑ тунӑ педагогсем хушшинче Сухоречкăри вырӑс чӗлхипе литература учителӗ Надежда Игнатьева. Пысӑк наградăна республика ертӳҫи аллинчен илме икӗ хут кӑмӑллӑ пулнине палӑртрӗ вӑл.

— Эпӗ Сухоречка шкулӗнче 47 ҫул ӗҫлетӗп, 30 ҫул географи учителӗ пулса ӗҫлерӗм. Ĕçленĕ çулсем тăршшĕпе яланах тава тивӗҫлӗ учителӗн званийӗ патне пытăм, манӑн мӗнпур наградӑсемпе ҫӗнтерӳсем ҫавна ҫирӗплететчӗҫ.

Чаплӑ мероприятие вак-тӗвек таранах шухӑшласа хунӑ. Залра чӗрӗ музыка вылярĕ, фуршет сӗтелĕ, ӑшӑ атмосфера хуçаланчĕ. Радий Хабиров пирӗн пата çывăх çынсем патне килнĕ пек ăшшăн кулса кĕчĕ, саламларĕ. Вӑл ниҫта та васкамарӗ, ӑшӑ сӑмахсем каларӗ, — каласа пачӗ Надежда Игнатьева.

Карина ПАВЛОВА.

Сăнÿкерчĕкĕ: Надежда Игнатьеван архивĕнчен.

Тĕплĕнрех «Светлый путь» хаçатра вулăр.