Ҫине тӑрсах вĕренмелли телейлӗ вӑхӑт

Пишпÿлекри Альбина Тихонова студент пурнӑҫӗ мӗнпе асра юлни ҫинчен каласа пачӗ.

Акмулла ячĕллĕ Пушкӑрт патшалӑх педагогика университечӗн студенчӗ Альбина Узбекистан Республикинче ҫуралнӑ. 1996 ҫулта ҫемьепе Пушкăртстана куҫса килнĕ, иккӗмӗш класран пуçласа тӑххӑрмӗш класс таран Çирĕклĕре вӗреннӗ.

— 2009 ҫулта Пелепей педагогика колледжне пĕтертĕм, пуҫламӑш классен вӗрентекен квалификацийӗ тата вырӑс чӗлхипе литература енӗпе хушма хатӗрленÿ илтĕм. Халӗ Пушкӑрт патшалӑх педагогика университечӗн виҫҫӗмӗш курс студенчӗ. Психологи факультечĕн студентки пулна май, Пишпÿлекри 2-мĕш вӑтам шкулта педагогика практики иртрĕм. Практика ертӳҫи Лариса Семеновна Валиуллина, аслӑ квалификаци категорийӗнчи педагог-психолог пулчĕ. Мана ачасемпе ӗҫлеме, калаҫусем ирттерме, класа сӑнама, ачасемпе класс тулашĕнчи занятисем ирттерме килӗшрӗ, — каласа парать Альбина Валерьевна.

Альбина Валерьевна Пишпÿлекри «Умка» ача садӗнче воспитательте ӗҫлет.

— Манӑн професси — хушма пӗлӳ педагогӗ. Педагог пулма шут тытни тарăн шухăшласа тата нумай фактсемпе ҫирӗплетсе йышăннă. Манӑн тӗп ӗҫ ачасемпе, вӗсен ашшӗ-амӑшӗсемпе ҫыхӑннӑ, ҫавӑнпа та манӑн ҫынсен психологине пӗлмелле.

Альбина шкул ҫулӗсене ӑшшӑн аса илет.

— Манӑн класра 16 ҫынччĕ. Виҫӗ арçын ача тата 13 хӗрача. Класс туслӑ, хаваслӑччĕ. Класс ертӳҫи Александр Иванович Иванов — чаплӑ учитель тата питӗ лайӑх ертӳҫӗ. Вӑл вӗрентнӗ истори урокӗсенче яланах кӑсӑклӑ та нумай пĕлÿ илме пулатчĕ. Яланах мероприятисем, уявсем, концертсем, акцисем хатӗрлеме пулӑшатчӗ.

Альбина Тихонова асӗнче студентсен телейлӗ вӑхӑчӗ ҫине тӑруллă ӗҫпе, туслӑхпа тата юратупа тулнӑ кунсемпе яланлӑхах юлать.

Карина ПАВЛОВА.

Сăнÿкерчĕкĕ: Альбина Тихонован архивĕнчен.

Тĕплĕнрех «Светлый путь» (№3, 2022 çулхи январĕн 21-мĕшĕ) хаçатра вулăр.