Хӑй тӗслӗхӗпе вӗрентет

50 ҫул стаж пухнă педагог Виталий Афанасьев хӑйӗн пӗтӗм пурнӑҫне ачасене спортпа сывӑ пурнӑҫ йӗркине явӑҫтарма халалланӑ
Виталий Лукич Афанасьев 1951 ҫулхи февралӗн 14-мӗшӗнче Кистенлĕ ялӗнче ҫуралнӑ. Кистенлĕри сакӑр ҫул вĕренмелли шкултан вӗренсе тухнӑ хыҫҫӑн 1969 ҫултан пуҫласа 1971 ҫулччен ҫарта пулнӑ. Арми хыҫҫӑн Виталий Лукич Пелепей хулинчи "Автонормаль" заводра ултӑ ҫул ӗҫленӗ. 1978 ҫултан пуҫласа паянхи кунчченех вӑл Константин Иванов ячӗллӗ Пăслăкри вӑтам шкулти физкультура преподавателӗ пулса ĕçлет. Виталий Лукичӑн шкулти пӗтӗмӗшле ӗҫ стажӗ 50 ҫула ҫитет. Спортпа туслă, активлӑ, вӑл халӗ те спорт никĕсĕсене хӑйӗн тӗслӗхӗпе вӗрентет. Унӑн вӗренекенӗсем районти тата республикӑри спорт мероприятийӗсен призерӗсем пулса тӑраҫҫӗ.
Виталий Лукичӑн мӑшӑрӗ Людмила Николаевна та Кистенлĕ ялӗнче ҫуралса ӳснӗ, вăл та преподаватель. Унӑн шкулти ӗҫ стажӗ 45 ҫул, 16 ҫул — Константин Иванов ячӗллӗ Пăслăкри вӑтам шкул директорӗ. Людмила Николаевна директор пулнă çулсенче шкул улшӑннă, вӗренекенсемпе преподавательсемшӗн ҫутӑ та хӑтлӑ пулса тӑнă. Районти тата зонӑри мероприятисем шӑпах çав шкулта иртеҫҫӗ, мӗншӗн тесен шкулӑн ҫӳллӗ шайӗ район мӑнаҫлӑхӗ шутланать.
Афанасьевсен икӗ ывӑл — Владимир тата Александр. Вӗсем хӑйсен ҫемйисене йӗркеленӗ, ашшӗ-амӑшне пилӗк мӑнук - Александр, Катерина, Владислав, Ярослав тата Арсений - парнеленӗ. Мӑшӑрсем пысӑк хуҫалӑх тытаҫҫӗ, вӗсен выльӑх-чӗрлӗх, тирпейлекен участоксем нумай.
Шкулта вӗрентнĕ май, хастар пурнӑҫпа пурăнса Афанасьев мӑшăрсем яланах вӗренӳ, обществӑпа культура, спорт мероприятийӗсен малти ретĕнче. Хӑйсен тивӗҫлӗ ӗҫне тата обществӑпа усӑллӑ ӗҫне вӗсем тӑван енпе Пăслăк ялне аталантарас ӗҫе хываҫҫӗ.
Виталий Лукичӑн сывлӑхлӑ пулас ӗмӗт пур. Тата купӑс туянма, унпа выляма, юрлама, пурнӑҫшӑн савӑнма.
Елена ФЕДОТОВА,
Константин Иванов ячĕллĕ Пăслакри вӑтам шкул директорӗн воспитани енӗпе ӗҫлекен заместителӗ.
Сӑнӳкерчӗкӗ: Владимир СМОЛОВ.