Ҫӗнӗ ҫитӗнӳсем патне ӑнтӑлаҫҫӗ

 

2023-2024 вӗренӳ ҫулӗнчи районти пӗтӗмӗшле пӗлӳ паракан чи лайӑх организацийӗсен смотр-конкурс пӗтӗмлетӗвӗсем тӑрӑх Хушăлкари вăтам шкула районти пӗтӗмӗшле пӗлӳ паракан чи лайӑх организаци тесе йышӑннӑ.

 

Шкул вӑл - учительсем унӑн пӗтӗм историйӗшӗн пухнӑ педагогика опычӗн, районта тата республикӑра чапа тухнӑ вӗренекенсен ҫӗнтерӗвӗсен управҫи. Паян Хушăлкари вӑтам шкул — пӗрлешӳллӗ, яланах аталанакан коллектив, хӑйӗн профессийӗпе пурӑнакан, йӑла-йӗркесене тытса пыракан тата ҫӗнӗ вӗренӳ проекчӗсене хутшӑнма хатӗр коллектив. 2021 ҫултанпа шкула Альбина Самгутовна Газизова директор ертсе пырать. Унӑн кулленхи ӗҫӗ, ӗҫченлӗхӗ, ачасене юратни, общество хастарлӑхӗ хӑйӗн результачӗсене парать. Альбина Самгутовна ертсе пынипе педагогсен коллективӗ пысӑк ӗҫ тунӑ, ҫавна пула 2023-2024 вӗренӳ ҫулӗнче Хушăлкари вăтам шкула пӗтӗмӗшле пӗлӳ паракан чи лайӑх организацийӗ тесе йышӑннӑ.

Хальхи вӑхӑтра шкулта 91 вӗренекен вӗренет. Шкул коллективӗ 31 работникрен тӑрать. Вӗренӳ процесне 16 педагог пурнӑҫлать. Вӗсем пурте аслӑ категориллӗ. Нумайӑшӗн республика, Раҫҫей шайӗнчи наградӑсем пур. "Пушкӑрт Республикин Тава тивӗҫлӗ учителӗ" кӑкӑр палли Н.Е. Васильеван пур. РФ Вӗренӳ тата наука министерствин хисеплӗ грамотипе Е.Г. Семенована, Г.Р. Газизована, А.С. Газизована, В.И. Яковлева, Н.Е. Васильевана, С.Г. Иванована наградăланă; И.Г. Степанова, А.А. Степанов — ПР вӗренӳ отличникӗсем.

Вӗренӳ тытӑмне аталантарма республикӑра комплекслӑ майпа усӑ кураҫҫӗ: пурлӑхпа техника никӗсӗ лайӑхланать, педагогсемпе вĕренекенсем валли мотиваци тытӑмӗ йӗркеленет, ҫӗршыври вӗрентӗвӗн чи лайӑх практикисене ӗҫе кӗртеҫҫӗ. Вӑтам шкулта ачасене ӑс-хакӑлпа ÿт-пÿ аталанӑвӗнче мӗн кирлине пурнӑҫлама ҫителӗклӗ пурлӑх никӗсӗ пур. Педагогсен пысӑк пултарулӑхӗ, вӗсем ҫӗнӗ ҫитӗнӳсем патне туртӑнни, пуян опыт аталанма, тӗрлӗ конкурссемпе проектсенче хутшӑнма тата ҫӗнтерме пулӑшать. Шкул учителӗсем кашни ҫул районти, республикӑри, пӗтӗм Раҫҫейри олимпиадӑсемпе конкурссен ҫӗнтерӳҫисемпе призерӗсене хатӗрлеҫҫӗ. 2023-2024 вӗренӳ ҫулӗнче пӗтӗм тӗнчери конкурссене 72 ача хутшӑннӑ, пӗтӗм Раҫҫейри — 21, республикӑри - 15. Вӗсенчен нумайӑшӗ призерсем, ҫӗнтерӳҫӗсем пулса тӑнӑ. Педагогсем "Çулталӑк учителӗ" йышши тӗрлӗ професси конкурсӗсене хастар хутшӑнаҫҫӗ, дистанци вӗрентӗвӗн курсӗсем, тӗрлӗ шайри вебинарсем урлӑ хӑйсен квалификацине ӳстереҫҫӗ. Шкулта вӗренӳ тата воспитани процесне лайӑхлатас енӗпе тӗллевлӗ наукӑпа методика ӗҫӗ иртет. Вӗрентӳ пахалӑхне тивӗҫтерес тӗллевпе учительсем хальхи технологисене вӗренӳ процесне хӑнӑхтараҫҫӗ тата ӗҫе кӗртеҫҫӗ. Сӑмахран, шкулта регионсемпе федераци проекчӗсем ӑнӑҫлӑ пурнӑҫланаҫҫӗ: "Хальхи шкул - ӳсӗм точки", "Кашни ачан çитӗнӗвӗ" - хушма пӗлӳ паракан хушма вырӑнсем туса хурасси, "Цифра вӗренӳ хутлӑхӗ", "Пуласлӑх учителӗ", "Вӗҫ!", "Сывӑ ӑру - сывӑ наци". Шкула "Раҫҫейри вӗренӳ организацийӗсен агроклассенче тата агроэкологи пӗрлешӗвӗсенче пысӑк технологиллӗ ял хуҫалӑх производствине йӗркелес тата унпа тухӑҫлӑ усӑ курассине йӗркелес ӗҫе хутшӑннӑ" конкурсра ылтӑн медальпе наградӑланӑ. Спортсменсем районти тата республикăри ӑмӑртусенче час-часах ҫӗнтерӳҫӗсем пулса тӑраҫҫӗ.

Вӗренекенсене патриотла воспитани парассине те пысӑк тимлӗх уйӑраҫҫӗ. Шкулта Юнармин ҫарпа патриот клубӗ пур, унӑн ӗҫӗ-хӗлӗ юнармеецсене ырӑ кӑмӑллӑ пулма, хӗрхенме, тӳрӗ кӑмӑллӑ пулма, Тӑван çӗршыва, культурӑна юратма вӗрентме янӑ.

Шкулта "С" категорири тракторист профессине илме пулать. Ăна производство ӗҫӗн ӑсти Виктор Иванович Яковлев вӗрентет. Хушăлка ялӗнчи вӑтам шкултан вӗренсе тухакансем лайӑх кӑтартусене ҫирӗп кӑтартса ОГЭ тата ЕГЭ ӑнӑҫлӑ параҫҫӗ. Пӗлтӗр шкултан тӑхӑр ача вӗренсе тухнӑ, вӗсенчен иккӗшӗ - медалистсем.

Вӗрентĕвĕн ҫӳллӗ шайӗ, хӑтлӑ условисем, пурлӑхпа техника никӗсӗ, педагогсен профессионализмӗ — ҫаксем пурте Хушăлка вӑтам шкулӗнче пур. Пӗри улшӑнмасть: шкул коллективӗ малтанхи пекех ачасемшӗн ӗҫлет. Шкулта хӑйсен ӗҫӗпе хавхаланнӑ педагогсем, кашни ачапа ӗҫлеме хатӗр творчествӑллӑ чун-чӗресем вӑй хураҫҫӗ.

— Лайӑх ĕçĕн тӗп условисенчен пӗри - туслӑ коллектив. Вӑл пирӗн тахҫантанпах ҫирӗп. Пурте тӳрӗ кӑмӑлпа ӗҫлеҫҫӗ. Пирӗн сотрудниксем пурте сисӗмлӗ, ырӑ кӑмӑллӑ, нумай вӗреннӗ ҫынсем. Питӗ тӑрӑшакан техперсонала та уйрӑммӑн палăртас килет. Шкул ҫумӗнчи участок та пирӗн яланах лайӑх. Кашни ҫул пахча лартатпӑр, пахчаҫимӗҫ ӳстеретпӗр. Ҫулла унта пурте пӗрле активлӑ ӗҫлетпӗр. Пирӗн шкул кӑсӑк, тулли пурнӑҫпа пурӑнать, вӗренӳ процесне яланах ҫӗнӗ япаласем хутшӑнаҫҫӗ. Ку пӗтӗм коллективӑн тава тивӗҫлӗ ӗҫӗ, — палӑртать Хушăлкари вӑтам шкул директорӗ.

Неля САБАХОВА.

Сӑнӳкерчӗкӗ: Неля Сабахова.